Депутат: "Саламаттыкты сактоо министри эл көзүндөгү адам экенин унутпашы керек"

Бүгүн, 17-мартта Жогорку Кеңештин жыйынында депутат Дастан Бекешев саламаттыкты сактоо министри Алымкадыр Бейшеналиев эл көзүндөгү адам экенин унутпашы керектигин эскертти.

"Саламаттыкты сактоо министри өзүн туура эмес алып жүрүп жатат. Президент буга өзү реакция кылышы керек. Эл президенттин дагы урматуу дарыгерибизге болгон мамилеси ушундай деп ойлоп калышат. Мен президенттин дагы ою кандай деп ойлобойм. Жарандар дагы бийликке, окуучулар дагы мугалимдерге ошондой мамиле кылышат. Министр эл көзүндөгү адам экенин унутпасын", - деди ал.

Белгилесек, 14-мартта министр Алымкадыр Бейшеналиев Бишкектеги "Тез жардам" ооруканасына барганда, Чүй облустук ооруканасындагы Эрнст Акрамов атындагы хирургия илимий борборун жапканын билдирген.

Мындан тышкары Алымкадыр Бейшеналиев хирург Эрнст Акрамовдун атын ооруканага эле эмес, оорукананын бир бөлүмүнө берүүгө дагы татыксыз деп эсептерин айткан. Депутат Исхак Масалиев белгилүү хирург Эрнст Акрамовдун жашоосуна шарт түзүп берүү керектигин билдирсе, Эдил Байсалов хирург Акрамов боюнча кооптонууга негиз жок экенин социалдык тармакка жазган.

Биздин Телеграм каналга катталыңыз.

Автор: Жылдыз Джускембаева