Президент Садыр Жапаров бүгүн, 13-октябрда Астана шаарындагы (Казакстан Республикасы) Азиядагы өз ара аракеттенүү жана ишеним чаралары боюнча кеңешмеге (АӨИЧК) мүчө мамлекеттердин VI саммитинде сөз сүйлөдү. Бул тууралуу президенттин администрациясынан билдиришти.
Анда өлкө башчы Кыргызстан цивилизациялар аралык диалогго жана Азия чөлкөмүнүн өлкөлөрүнүн ортосундагы өз ара түшүнүшүүнү бекемдөөгө көмөктөшүүчү аймактык кызматташтыкты кеңейтүү боюнча күч-аракеттерди кубаттай тургандыгын билдирди.
"Азиядагы өз ара аракеттенүү жана ишеним чаралары боюнча кеңешмеге (АӨИЧК) мүчө мамлекеттердин алтынчы саммитинин катышуучулары менен учурашып жатканыма чын жүрөктөн кубанычтамын. Быйыл, 5-октябрда форумдун алкагында кызматташуубузга 30 жыл толду. Бул мезгилдин ичинде АӨИЧК ар түрдүү цивилизацияларды жана региондорду камтыган көп тараптуу форум катары, концепциядан Азия чөлкөмүндө коопсуздук чөйрөсүндө диалог жана кызматташтык үчүн натыйжалуу аянтчаны түзүүгө чейинки ырааттуу жолду басып өттү. Азыркы учурда кеңешме саясий, экономикалык, гуманитардык чөйрөлөрдө ишеним чараларын ишке ашыруунун, ошондой эле жалпы чакырыктарга жана коопсуздукка жана туруктуулукка коркунучтарга каршы туруу үчүн мурдатан калыптанып калган механизм болуп саналат.
Бул контекстте Кыргызстан Казакстандын АӨИЧК төрагалык кылуу миссиясын улантуу чечимин толугу менен колдойт, бул анын ишинин натыйжалуулугун жогорулатууга багытталган белгиленген пландарды ишке ашырууга мүмкүндүк берет.
Ошондой эле Кыргызстан цивилизациялар аралык диалогду өнүктүрүүгө жана Азия чөлкөмүнүн өлкөлөрүнүн ортосундагы өз ара түшүнүшүүнү бекемдөөгө шарт түзгөн аймактык кызматташтыкты кеңейтүү боюнча күч-аракеттерди кубаттайт. Ушуга байланыштуу биз Кувейт мамлекетинин биздин жолугушууга мүчө мамлекет катары кошулуу чечимин кубаттайбыз. Кувейт тарапка АӨИЧКте жемиштүү жана өз ара пайдалуу кызматташууну каалайм.
Мындан тышкары акыркы 30 жыл ичинде топтолгон позитивдүү тажрыйбага жана катышуучу өлкөлөрдүн тыгыз кызматташууга умтулуусуна таянып, конференция келечекте Азиядагы кызматташтык жана коопсуздук боюнча толук кандуу уюмга айланышы керек. Кеңири географиялык өкүлчүлүк, эбегейсиз айкалышкан соода-экономикалык, инвестициялык жана адамдык потенциал АӨИЧКке Азия мейкиндигинде туруктуу өнүгүү коомчулугун түзүүгө толук мүмкүнчүлүк берет. Кыргызстан бул жаратман процесске активдүү катышып, өзүнүн салымын кошууга даяр.
Аймакта коопсуздукту камсыз кылуу көйгөйлөрү, Ооганстанды кайра курууга көмөктөшүү маселелери, өлкөлөрдүн турмушунун түрдүү чөйрөлөрүндө ири регионалдык инфраструктуралык долбоорлорду ишке ашыруу платформабыздын алкагында приоритеттүү милдеттер бойдон калууга тийиш деп эсептейм.
Мүмкүнчүлүктөн пайдаланып, кыргыз тараптын экономикалык өлчөмдүн „соода жана инвестиция“ тармагындагы тең-координатору болуу чечимин белгилегим келет. Бүгүнкү күндө Азия дүйнөлүк экономиканын локомотиви болуп саналат, ошондуктан биздин көңүлүбүздү экономикалык багытты өнүктүрүүгө буруу өтө маанилүү. Биз бул жаатта жемиштүү кызматташтыкты күтөбүз.
Бүткүл дүйнөдө тынчтыкты, глобалдык коопсуздукту, туруктуу өнүгүүнү жана социалдык прогрессти камсыз кылуу үчүн БУУнун жалпы ишине өз салымыбызды кошууга умтулабыз. Ушуга байланыштуу БУУнун жана бүткүл дүйнөлүк коомчулуктун көңүлүн чакан мамлекеттердин көйгөйлөрүнө буруу максатында Кыргызстан 2027-2028-жылдарга БУУнун Коопсуздук кеңешинин туруктуу эмес мүчөлүгүнө талапкерлигин сунуштады. Биз талапкерлигибиздин колдоо табарына ишеним артабыз.
Урматтуу саммиттин катышуучулары! Жыйынтыктап айтканда, тынчтыкты жана коопсуздукту сактоодо, мамлекеттердин туруктуу өнүгүүсүн камсыз кылууда, анын ичинде элдерибиздин турмуш деңгээлин жана жыргалчылыгын жогорулатууда алдыбызга коюлган милдеттерди чечүүгө биргелешип жетише аларыбызды белгилегим келет.
Сөзүмдү жыйынтыктап жатып казак тарапка биздин жолугушуубузду мыкты уюштургандыгы, жылуу мамилеси жана меймандостугу үчүн дагы бир жолу ыраазычылык билдиргим келет. Бүгүнкү алтынчы саммиттин жыйынтыктары кеңешменин тарыхындагы маанилүү этап болуп калат жана Азияда тынчтыкты жана коопсуздукту камсыз кылууга практикалык салым кошот деп ишенем.
Учурдан пайдаланып, БУУнун Адам укуктары боюнча кеңешинин мүчөлүгүнө биздин талапкерлигибизди колдогону үчүн АӨИЧКнын бардык мамлекеттерине ыраазычылык билдиргим келет.
Көңүл бурганыңыздарга рахмат", - деп сүйлөдү өлкө башчы.
Президент Садыр Жапаров бүгүн, 13-октябрда Астана шаарындагы (Казакстан Республикасы) Азиядагы өз ара аракеттенүү жана ишеним чаралары боюнча кеңешмеге (АӨИЧК) мүчө мамлекеттердин VI саммитинде сөз сүйлөдү. Бул тууралуу президенттин администрациясынан билдиришти.
