Садыр Жапаров КМШ өлкөлөрүнүн башчыларынын жыйынына катышуу үчүн конгресс-борборго келди (фото)

Президент Садыр Жапаров бүгүн, 14-октябрда Көз карандысыз мамлекеттердин шериктештигине мүчө-мамлекеттердин башчыларынын кеңешинин кезектеги жыйынына катышуу үчүн Астана шаарындагы конгресс-борборго келди. Бул тууралуу президенттик администрациядан билдиришти.

Иш-чарага катышуу үчүн келген КМШ мамлекеттеринин башчыларын конгресс борбордо Казакстандын президенти Касым-Жомарт Токаев тосуп алды.

Учурашуу жана чогуу сүрөткө түшүү аземи аяктагандан кийин өлкө лидерлери тар курамдагы жолугушуу залына өтүштү.

Иш-чаранын алкагында Шериктештиктин ичинде өз ара аракеттенүүнүн актуалдуу маселелери талкууланып, КМШга мүчө өлкөлөрдүн ортосундагы кызматташтыкты өнүктүрүү жана бекемдөө боюнча бир катар документтер каралып, кабыл алынат.

Жыйында 2023-жылы КМШга төрагалык кылууну Кыргыз Республикасына өткөрүп берүү жана мамлекет башчыларынын кеңешинин кезектеги отурумун Бишкек шаарында өткөрүү боюнча чечим кабыл алынышы күтүлүүдө.

Автор: Азат Бейшенбеков