Акылбек Жапаров Астанада чек арадагы текшерүүлөрдү минималдаштыруу зарыл экенин айтты

Министрлер кабинетинин төрагасы Акылбек Жапаров бүгүн, 28-октябрда Астанада өтүп жаткан КМШнын өкмөт башчылар кеңешинин кезектеги жыйынында азык-түлүктү экспорттоого чектөө чараларын кайрадан карап чыгып, чек арадагы ар кыл тоскоолдуктарды жана текшерүүлөрдү минималдаштыруу зарыл экенин билдирди.

Өкмөттүн маалымат кызматы билдиргендей, Жапаров өз сөзүндө улуттук экономикалардын тышкы рыноктордон көз карандылыгын төмөндөтүү жана КМШ ичинде ишкер байланыштарды жандантуу боюнча практикалык чараларды ишке ашырууга басым жасады.

Министрлер кабинетинин төрагасы азык-түлүктү экспорттоо боюнча чектөө чараларын кайрадан карап чыгуу, чек аралардагы ар кандай тоскоолдуктарды жана текшерүүлөрдү азайтуу, иштеп жаткан транспорттук коридорлорду өнүктүрүү жана жаңысын түзүү зарыл экендигин белгилеген.

Анын айтымында, Кыргызстандын КМШ өлкөлөрү менен тышкы соода жүгүртүүсү 2022-жылдын январь-августунда 2021-жылдын ушул мезгилине салыштырмалуу 29,7 пайызга өскөн, ал эми экспорт 41 пайызга, импорт 25,7 пайызга жогорулаган.

Ошондой эле өкмөт башчы миграциялык күн тартипке кеңири токтолду.

"Биз тараптарды эмгек миграциясы жаатында кызматташууну активдештирүүгө чакырабыз. Шериктештиктин алкагында тышкы эмгек миграциясы жана анын масштабы биздин өлкөлөрдүн социалдык-экономикалык өнүгүүсүнө олуттуу таасирин тийгизип, коомдун дээрлик бардык тармактарына таасирин тийгизээри талашсыз. Биримдик өлкөлөрүнүн алдында КМШда жалпы эмгек рыногунун орун алуусунун зарыл шарты катары ички чек аралардан эркин өтүүнү камсыз кылуу боюнча маанилүү милдет турат деп эсептейбиз",- деди ал.

Жапаров сөзүнүн соңунда 2023-жылы белгилүү кыргыз жазуучусу Чыңгыз Айтматовдун 95 жылдыгына арналган иш-чараларды өткөрүү пландалып жаткандыгын билдирди.

"Жазуучунун 157 тилге которулган чыгармалары менен тааныш болгон дүйнөлүк коомчулук бул иш-чарага кошулат деп ишенем", -деп сөзүн жыйынтыктады министрлер кабинетинин башчысы.

Автор: Бек Оморбеков
Фото: Министрлер кабинетинин маалымат кызматы