Самаркандда ЕАЭБге мүчө мамлекеттердин парламент жетекчилери жолугушту

Бүгүн, 28-октябрда Өзбекстандын Самарканд шаарында Евразия экономикалык биримдигине кирген өлкөлөрдүн парламент жетекчилери жолугушуп, соода-экономикалык, маданий-гуманитардык алакаларды арттыруу маселелерин талкуулашты. Бул тууралуу Жогорку Кеңештин басма сөз кызматы кабарлады.

Маалыматка ылайык, жолугушууга Жогорку Кеңештин төрагасы Нурланбек Шакиев, Орусиянын Федералдык Жыйынынын Федерация Кеңешинин төрайымы Валентина Матвиенко, Казакстандын Парламентинин Сенатынын төрагасы Маулен Ашимбаев, Армениянын Улуттук Жыйынынын төрагасы Ален Симонян жана Беларусь Республикасынын Улуттук Жыйынынын Кеңешинин төрайымы Наталья Кочанова катышты.

"Тараптар ЕАЭБ алкагындагы айрым маселелер боюнча баарлашып, анын ичинен Улуу Ата Мекендик согуштун каармандарынын эрдигин даңазалоо максатында "Эскерүү поезди" долбоорун биргелешип өткөрүү тууралуу сүйлөшүштү. Аталган долбоор менен Улуу Ата Мекендик согуш жүргөн аймактар боюнча каттамдар белгиленип, ал аркылуу биримдикке кирген өлкөлөрдүн жаштарына майдандагы эрдиктер жана урунттуу окуялар тааныштырылат",- деп айтылат маалыматта.

Автор: Бек Оморбеков
Фото: Жогорку Кеңештин басма сөз кызматы