"Эл ансыз деле кыйналып жатат". Икрамов ОСАГО мыйзамын 2025-жылга жылдырууну сунуштады

Бүгүн, 24-январда Жогорку Кеңештин Транспорт, коммуникациялар, архитектура жана курулуш боюнча комитетинин жыйынында эл өкүлү Тазабек Икрамов унааларды милдеттүү камсыздандыруу (ОСАГО) боюнча мыйзамдын аткарылышын 2025-жылга жылдырууну сунуштады.

Депутат учурдагы кымбатчылыктан улам эл кыйналып жатканын билдирди.

"Эл ансыз деле кыйналып жатат. Ошондуктан 2025-жылга чейин жылдыруу зарыл. Камсыздандыруу ыктыярдуу түрдө болушу керек. Сөзсүз түрдө кымсыздандырыш керек деген туура эмес. Ким буга кызыкдар болсо өзүнүн унаасын камсыздандырсын, керек болсо өзүнүн денесин да камсыздандырып алсын. Мөөнөттү узартпасак элдин нааразычылыгы көбөйөт", - деди Икрамов.

Белгилей кетсек, ОСАГО жөнүндө мыйзам жети жыл мурун кабыл алынган. Бирок документти ишке ашыруу ушул жылга чейин бир нече жолу кийинкиге калтырылып келген. Эми өлкөдө айдоочулар автотранспорттук жоопкерчиликти милдеттүү камсыздандыруу полисин (ОСАГО) ушул жылдын башынан тарта алып башташы керек. 1-апрелден тарта полиси жокторго 3000 сомдон айып пул салынары кабарланган.

Автор: Бек Оморбеков
Фото: Бек Оморбеков