Кытайдагы Универсиада оюндарында жеңил атлетчи Нурсултан Кеңешбеков коло утту

Кытайдын Чэнду шаарында өтүп жаткан Бүткүл Дүйнөлүк студенттик (Универсиада) оюндарында кыргызстандык жеңил атлетчи Нурсултан Кеңешбеков коло байгенин ээси болду. Бул тууралуу бүгүн, 7-августта Дене тарбия жана спорт департаментинен билдиришти.

Маалымдалгандай, жөө күлүк 174 өлкө катышкан таймашта 5 миң аралыкка чуркап, жыйынтыгында 3-орунду багындыра алды.

Белгилей кетсек, Кытайда өтүп жаткан Универсиада оюндары 27-июлда башталган, 9-августта жыйынтыкталат. Кыргызстандык студенттер командасы спорттун 5 түрүнөн жеңил атлетика, дзюдо, стол тенниси, таэквондо жана спорттук ок атуу боюнча катышууда.

Аталган иш-чарага Дене тарбия жана спорт департаментинин алдындагы “Жаштык” массалык иш-чаралар жана жаштар менен иштөө дирекциясы тарабынан 2 миллион сом акча каражаты бөлүнгөн.

Автор: Гүлкайыр Абдиманнап кызы