Үч адамдын өлүмүнө айыпталган Чынтемир Аширалиев акыркы сөзүн айтты

Бүгүн, 15-январда Бишкек шаардык сотунда үч адамды өлтүргөн деп айыпталып өмүр бою эркинен ажыратылган Чынтемир Аширалиевдин жактоочусунун апелляциялык арызын кароо уланууда.

Анда судья Аширалиевге соттогу акыркы сөздү берди. Айыпталуучу соттон өмүр бою эркинен ажыратууну эмес, белгилүү бир мөөнөткө жаза берүүнү суранды.

"Белгилүү бир мөөнөт берүүңүздү суранам. Мен толук кандуу күнөөлүү эмесмин. Аллах бар, баары Алланын колунда. Белгилүү бир мөөнөт сурайм", - деди Аширалиев.

Сот чечим кабыл алуу үчүн кеңешме бөлмөсүнө кетти.

Аширалиев буга чейин окуя болгон күн эсинде жок экенин, бирок балдарды ал өлтүрбөгөнүн айткан.

Эске салсак, 2023-жылдын 16-февралында борбор калаанын 5-кичи районунда 51 жаштагы аял (Алтынай Канзаманова) жана анын 17 жаштагы кызы менен 9 жаштагы уулу киши колдуу болгон. Кылмышка шектүү катары 1986-жылы туулган Чынтемир Аширалиев аттуу Баткен облусунун Кадамжай районунун тургуну өзүнүн үйүнөн кармалган. Аталган факты боюнча Кылмыш-жаза кодексинин 122-беренеси (Адам өлтүрүү) менен кылмыш иши козголгон.

3-ноябрда Октябрь райондук соту Чынтемир Аширалиевди үч адамды өлтүргөн деп таап, өмүр бою эркинен ажыраткан.

Анын жактоочусу шаардык сотко апелляциялык арыз менен кайрылган болчу.

Маалым болгондой, шектүү Аширалиев кармаш уруш боюнча спорттун чебери болгон. Ал 2006-жылы Мамлекеттик күзөт кызматына кабыл алынган. Ал эми 2010-жылы аталган кызмат жоюлуп, түзүмдүк бөлүм катары УКМКга киргизилген. 2021-жылы эмгек стажына байланыштуу пенсияга чыгып, УКМКнын 9-кызматынан бошотулган. Шектүү жетекчилик кызматтарда да иштеген. Аскердик наамы - майор. Мындан сырткары 2021-жылы Жогорку Кеңешке шайлоодо Баткен окуругунан депутаттыкка талапкер болгон.