"Ала-Арча" соода борборунун жетекчиси ири өлчөмдөгү алдамчылыкка шектелип кармалды

Бишкектеги "Ала-Арча" соода борборунун башкы директору алдамчылыкка шектелип кармалды. Бул тууралуу бүгүн, 26-январда Ички иштер министрлигинен кабарлады.

Маалыматка ылайык, былтыр ноябрь айынын аягында милицияга борбор калаанын тургуну арыз менен кайрылган. Ал 2018-жылы туруктуу киреше убадалап, "Фаргокоин" криптовалютасын сатуу боюнча бүтүмдүн шылтоосу менен 22 миң долларын жана 1 миллион сомун ээлеп алгандарга чара көрүүнү суранган. Келтирилген жалпы чыгым 2 миллион 969 миң сомду түзөт.

Бул факт боюнча Кылмыш-жаза кодексинин 209-беренесине (Алдамчылык) ылайык кылмыш иши козголгон.

Шектүү катары "Ала-Арча" соода борборунун башкы директору Тахир Байхомбаев кармалып, убактылуу кармоочу жайга киргизилди.

"ИИМдин Кылмыш иликтөө башкы башкармалыгынын маалыматына ылайык, бул алдамчылык боюнча башка жабыркаган жарандар дагы болушу мүмкүн. Иш боюнча кылмыш шериктештерин аныктоо максатында тергөө ыкчам иш-чаралары жүргүзүлүүдө", - деп айтылат маалыматта.

Автор: Кылымбек Бейшеев
Фото: ИИМ