Иранда биринчи жолу аба такси кызматы ишке киргизилди

Иран тарыхында алгачкы жолу аба таксисин расмий түрдө ишке киргизди. Бул тууралуу IRNA расмий маалымат агенттиги кабарлады.

Маалыматка ылайык, окуя Хорремшехр шаарынын бошотулушунун жылдыгына жана Транспорт жана шаардык өнүгүү министрлигине караштуу бир катар ири долбоорлордун ачылышына туш келди. Салтанаттуу иш-чарага өлкө президенти видеобайланыш аркылуу катышты.

Аба таксисинин алгачкы каттамы Кереж жана Казвин шаарларын байланыштырып, бул багытта туруктуу аба каттамдарынын башталганын белгиледи.

"Аба таксисин ишке киргизүү - ири келечеги бар жетишкендик. Бул кызмат Паям өзгөчө экономикалык зонасына инвестиция тартууга, улуттук экономиканы жандандырууга жана Альборз аймагынын өнүгүшүнө салым кошот", - деди министрдин кеңешчиси жана Паям эл аралык аэропортунун башкы директору Мохсен Хасанлу.

Анын айтымында, аба таксиси аз жүктөлгөн аба каттамдарын жандандырып, калктын авиация кызматтарына жеткиликтүүлүгүн кеңейтет. Ошондой эле бул жаңы кызмат инвесторлор үчүн жаңы мүмкүнчүлүктөрдү түзөт.

Ирандагы бул кадам транспорт жаатындагы жаңычыл аракеттердин бири катары каралууда. Аба таксиси кызматы келечекте башка шаарлар менен да кеңейиши күтүлүүдө.

Автор: Жазгүл Жаңыбаева