Нарында өнөр жай паркын куруу чечими кабылданды... Өкмөт мүчөлөрү жыйын кылышты

Кечээ, 6-ноябрда Ынтымак ордодо Министрлер кабинетинин кезектеги отуруму болуп өттү.

Өкмөттүн маалымат кызматы кабарлагандай, министрлер кабинетинин төрагасы Адылбек Касымалиев президенттин жетекчилиги астында өлкөнүн экономикасы жогорку өсүү темпин сактап, жылдан жылга эл аралык аброюн бекемдеп жатканын айтып, 2025-жылы ички дүң продукция 11,1 пайызга, 2026-жылдын 9 айында 10,8 пайызга өскөнүн билдирген.

Статистикалык көрсөткүчтөр боюнча, өлкөгө 2025-жылы 1 миллирд 310,8 миллион доллар тикелей чет өлкөлүк инвестиция тартылса, 2026-жылдын биринчи жарым жылдыгында бул көрсөткүч 709,9 миллион долларды түзгөн.

Отурумда ошондой эле чет өлкөлүк инвестицияларды тартуу жана аймактарды өнүктүрүү үчүн жагымдуу шарттарды түзүү максатында "Бишкек", "Каракол", "Лейлек", "Маймак" жана "Нарын" эркин экономикалык чөлкөмдөрү жөнүндө жоболорду бекитүү тууралуу" Министрлер кабинетинин токтомуна өзгөртүү киргизилген.

Мындан тышкары, Нарын облусунда энергияны көп керектеген төмөн көмүртектүү өндүрүштөрдүн өнөр жай паркын куруу жана эксплуатациялоо боюнча инвестициялык долбоорду ишке ашыруу максатында Министрлер кабинетинин тескемеси кабыл алынган.

Автор: Кылымбек Бейшеев
Фото: Министрлер кабинети