Тышкы иштер министрлиги: Американын Бостон шаарындагы жардыруу боюнча айыпталган кыргызстандыкка качкын статусу берилген

“АКШнын Бостон шаарында өткөн марафон учурунда террордук чабуулга тиешеси бар” деп айыпталган кыргызстандык 23 жаштагы Хайрулложон Матановго Америка тарабынан качкын статусу берилген. Бул тууралуу бүгүн, 2-июнда КРнын Тышкы иштер министрлигинин басма сөз кызматы билдирди.

“АКШнын аймагында туруктуу жашап келген Х.Матанов 2014-жылдын 30-майында "2013-жылдын апрель айындагы Бостондогу марафондо болгон жардырууну изилдөөгө тоскоолдук кылган" деген айыптын негизинде кармалган. АКШнын Бостон шаарынын прокуратурасынын бөлүмү менен ага документтерди жана буюмдук далилдерди жок кылуу, өзгөртүү жана жазууларды фальсификациялоо, ошондой эле жалган көрсөтмө бергендиги үчүн күнөө коюлган”,- деп кабарлады КРнын ТИМинин басма сөз кызматы.

Мындан тышкары адвокат Х.Матанов АКШга 2010-жылы студенттик виза менен келип, Квинси колледжинде эки жылдай окуп, бирок каражаттын тартыштыгына байланыштуу окуусун токтотконун билдирди.

“Учурда ал АКШнын аймагында качкын статусу менен жашап келүүдө. КРнын АКШдагы элчилигинин консулдук каттоосунда турбайт. Ушуга байланыштуу кыргыз тарабынан төмөндөгүлөр аныкталды: Х.Матанов - Кыргыз Республикасынын жараны, 1990-жылы туулган, улуту өзбек, Жалал-Абад облусуна караштуу Сузак районундагы Сузак айылынын тургуну. Аталган жаран укук коргоо органдарынын каттоосунда турбайт. Х.Матанов 2010-жылдын 26-майында Кыргызстандын аймагынан чыгып кетип, ошондон бери кайра өлкөгө кайтып келген эмес”,- деп маалымдады басма сөз кызматы.

Ошону менен бирге Кыргыз Республикасы Хайрулложон Матановго Америка тарабынан качкын статусу берилгендигине өзгөчө көңүл бурат. Кыргыз Республикасынын АКШдагы элчилиги АКШнын Мамлекеттик департаменти менен үзгүлтүксүз тыгыз байланышта.

Автор: Нургазы Аматов