Баткенде Тажикстан мамлекети менен достукту чыңдоого багытталган фестиваль өтөт

Сентябрь айында Тажикстандын Согдий облусунун жаштарынын Баткен облусуна келери күтүлүүдө. Бул тууралуу бүгүн, 15-августта өкмөттүн Баткен облусундагы өкүлчүлүгүнүн басма сөз кызматы билдирди.

Маалыматка ылайык, август айынын башында Баткен жана Согдий облусунун 60ка чукул жаштары эки өлкөнүн достугун чыңдоо, мамилени жакшыртуу максатында Тажикстанда Достук фестивалын өткөрүштү. Алар байыркы медициналык музейге, «Баракат» кургатылган жемиш иштетүүчү ишканасына, «Шероз» кол өнөрчүлүк окуу борборуна жана Согдий облусунун Тарых музейине барып кайтышты.

Мындан тышкары эки өлкөнүн жаштары «Биз достукту издейбиз» темасында концерттик программасын жана тамашаларын сунушташты.

Аны менен катар футбол боюнча достук мелдештери өткөрүлдү. Эки күн ичинде жаштар делегациясы Кайрак-Кум, Худжанд, Чкаловск шаарларында болушуп, тарыхый эстеликтер менен таанышты. "Мындай иш-чаралар эки элдин достугун чыңдайт жана түшүнүшө билүү, толеранттуулук жана тынчтыкты бекемдөөгө шарт түзөт" деп айтылат маалыматта.

Автор: Айсана Паизова