Ырчы Нурлан Насиптин туулган күнүнө карата сахналаш достору сюрприз даярдашты

"Супер-Инфонун" тандоосу боюнча "2012-2013-жылдардын супер ырчы мырзасы" наамынын ээси Нурлан Насиптин туулган күнүнө карата бүгүн, 10-сентябрда сааттын жебеси түнкү 12ни кагары менен анын сахнадагы жакын достору жагымдуу сюрприз тартуу кылышты.

Ырчылар Нурмат Садыров, Аваз Акимов, Илгиз Абдалиев, Асел Кадырбекова, "Миң кыялдын" бийчилери жана башка достору ырчынын үйүнө жашынып, күтүлбөгөн белек даярдашты.

"Жагымдуу белек болду. Чынын айтсам, мынчалык болот деп ойлогон эмесмин. Ага чейин башкалар туулган күнүм менен куттуктап жатышкан, бирок жакын досторум куттуктай элек болчу. Көрсө, сюрприз даярдап жатышкан экен. Бөлмөгө кирсем эле баары бир жерде турганын көрүп жүрөгүм түшүп калды. Буюрса, кечинде улантабыз, эми менден сюрприз болот",- деди Нурлан Насип.

Сюрприз тууралуу алдын ала Нурлан Насиптин туугандарына айтылгандыктан, ырчынын атасы, карындаштары мындай жагымдуу белекке салым кошушту. Спанч Бобдун баш кийимин кийгизген сахналаш достору каалоо-тилектерин айтып, бүгүн туулган күндү улантышарын билдиришти.

Автор: Айпери Ганыжан кызы