Дүйнөлүк көчмөндөр оюндары: Кыргызстан 17 мүнөттүн ичинде боз үй тигип рекорд койду

Бүгүн, 10-сентябрда Ысык-Көл облусунун Кырчын жайлоосунда маданий көргөзмө орун алууда. Өлкөнүн туш тарабынан келген өкүлдөр кыргыздын улуттук буюмдарын көргөзмөгө коюп, этношаарда кыргыздын каада-салттары көргөзүлүп жатат.

Анда кыргызстандыктар 17 мүнөттүн ичинде боз үй тигип рекорд коюшту. Уюштуруучулардын айтымында, буга чейинки рекорд 2006-жылы Монголия тарабынан коюлуп, ал 1 саат 12 мүнөткө созулган.

"Биздин боз үйлөр монголиялыктардыкынан айырмаланып турат. Алардын боз үйүн орнотуу татаалыраак болсо керек. Ошентсе да кыргыздын боз үйүн тигүү оңой эмес, ал 36 элементтен турат. Кураштырууда ар бир элемент маанилүү. Биздин алдыга койгон максатыбыз ишке ашты",- дейт "Кыргыз боз үйү" коомдук фондунун директору Бейшембек Жумашалиев.

Этношаарда 200гө чукул боз үй тигилип, маданий көргөзмөлөр башталды. 7 облустун өкүлдөрү бул жерде өзүлөрүнө тиешелүү аймактарды ээлеп, боз үй тигишкен. Жаштардын селкинчек тээп, күрөшүп, жаа атып эс алып жатканын көрүүгө болот.

Автор: Айпери Ганыжан кызы