Шашылыш билдирүү: 27-29-октябрь күндөрү аба ырайы кескин өзгөрүп, жамгыр жаап, карга айланат

27-29-октябрда аба ырайынын кескин өзгөрүлүшү күтүлөт: жаан жаап, карга айланат. Бул тууралуу 23-октябрда "Кыргызгидромет" агенттигинин басма сөз кызматы билдирди.

Маалыматка ылайык, республиканын Ош, Жалал-Абад облустарынын пахта себүүчү аймактарында жамгыр, тоо этектеринде жана тоолордо кар, айрым жерлерде жаан-чачын катуу жаайт. Кээ бир райондордо батыштан соккон шамалдын ылдамдыгы секундасына 17-22 метрге жетет. Айрым аймактарда абанын температурасы төмөнкүдөй болушу күтүлөт:

Дыйканчылык аймактарда түнкүсүн 0…-5° суук (пахта себүүчү аймактарда -1…-3° үшүк жүрөт), күндүз 0…+5° жылуу;

Тоо этектеринде түнкүсүн -3…-8° суук, күндүз -2°суук…+3° жылуу;

Тоолуу райондордо түнкүсүн -8…-13° суук, күндүз -3…-8° суук;

Бийик тоолуу райондордо түнкүсүн -15…-20° суук, күндүз -5…-10° суук болушу күтүлөт.

Мындай аба ырайы айыл чарба иштерин үзгүлтүккө учуратат, автоунаа, байланыш түйүндөрүн, энергетика жана коммуналдык кызматтардын ишин кыйындатат.

Автор: Нургазы Аматов