"Ийгиликтин паспорту" программасынын алкагында Кыргызстандын жаштары окуудан өтүшүүдө

Бишкекте 8-ноябрда өткөн жана 15-ноябрда Ош шаарында өтө турган форумдарда "Ийгиликтин паспорту" программасынын бүтүрүүчүлөрү жана коноктор программанын жыйынтыктары жана жеке ийгиликтери менен бөлүшөт. Ошондой эле катышуучу жаштар жумуш орундарынын жарманкесине жана лидерлик, убакытты туура бөлүштүрүү, топ түзүү, каражат тартуу, ыктыярчылык жана социалдык тармак боюнча сессияларга катыша алышат. Форумдардын жабылышында «Jasa.kg» программасынын катышуучулары майрамдык бий көрсөтүшөт.

Кыргызстандык жаштарга ийгиликке жетүүнүн жолдорун үйрөтүүчү окуу программасына Билим берүү жана илим министрлигинин, өнөктөштөрдүн өкүлдөрү, тренерлер жана өлкөнүн ар кайсы бурчунан келген 400дөн ашуун жаштар катышат. Программа АКШ Эл аралык өнүктүрүү агенттиги тарабынан каржыланган Эл аралык жаштар фондунун «Jasa.kg» долбоорунун маанилүү бөлүмү болуп саналат.

2012-2014-жылдардын аралыгында «Бала чак институту» Кыргыз Республикасындагы 26 балдар үйүнөн 1334 тарбиялануучуну жогорудагы программа аркылуу окутту. Жашоого зарыл каражаттарга жана жарандык катышууга басым жасаган бүтүрүүчүлөр коомчулуктарды өнүктүрүүнү колдогон 63 социалдык долбоорду ишке ашырышты.

Автор: Айпери Ганыжан кызы