Жалал-Абадда мечиттерди каттоочу атайын комиссия түзүлдү

Жалал-Абад облусунда мечиттерди каттоочу атайын комиссия түзүлдү. Бул тууралуу бүгүн, 13-ноябрда муфтияттын басма сөз кызматынан билдиришти.

Маалым болгондой, Жалал-Абад облустук казыятта райондук башкы имамдардын катышуусунда жыйын өткөн. Анда Дин башкармалыгынын 2014-жылы 31-октябрда чыккан №275 жана №276-буйругун тааныштыруу, ишке ашыруу маселелери каралды.

Буйрукта айтылгандай, мындан ары аймакта салынчу мечиттердин баары сөзсүз түрдө мамлекеттик каттоодон өтүшү керек. Ага ылайык, каттоону көзөмөлдөөчү атайын комиссия түзүлдү.

Жыйынга Жалал-Абад облусунун мусулмандар казысы Абдулазиз Закиров, казыят кызматкерлери, Сузак, Ноокен, Ала-Бука, Токтогул райондорунун башкы имамдары катышты. Алар болгон аракетин жумшоо менен мечиттерди расмий каттоого алуу боюнча комиссия уюштуруу иштерин жүргүзүшөрүн айтышты.

Автор: Мальвина Уметбекова