Чет өлкөлүк донорлор Улуттук статистика комитетине 2,5 миллион доллар бергени жатышат

Кыргыз өкмөтү менен Эл аралык реконструкциялоо, өнүктүрүү банкынын ортосундагы макулдашууга ылайык, Улуттук статистика комитетине берилчү каражатка байланыштуу мыйзам долбоору парламенттин 18-марттагы жыйынында каралып, добуш берүүгө жөнөтүлдү.

Аталган комитеттин төрагасы Акылбек Осмоналиевдин айтымында, донорлор тарабынан 2,5 миллион доллар өлчөмүндө каражат бөлүү пландалган. Бул каражат 4 багытта жумшалмакчы:

1) статистиканы уюштурууну жакшыртуу;

2) технологиялык потенциалды күчөтүү, маалыматтык-коммуникациялык технологияларды өнүктүрүү, статистикалык инфратүзүмдү жаңыртуу жана кеңейтүү;

3) статистикалык маалыматтарды өндүрүүнү жана жайылтууну модернизациялоо;

4) статистика чөйрөсүндөгү интеллектуалдык жана адам потенциалын бекемдөө сыяктуу Кыргыз Республикасынын статистикасын өнүктүрүү стратегиясынын негизги компоненттерин колдоо.

Автор: Нургазы Аматов