Депутаттар Тоң районунун тургундары менен алардын турак жайларын мыйзамдаштыруу жаатында пикир алышты

Жогорку Кеңештин депутаттары Талантбек Узакбаев, Эркингүл Иманкожоева, Самат Ибраев бүгүн, 31-мартта документи жок курулган турак жайлардын маселелерин чечип берүү өтүнүчү менен кайрылган Ысык-Көл облусунун Тоң районундагы Бөкөнбаев айылынын тургундары менен жолугушту. Бул тууралуу Жогорку Кеңештин басма сөз кызматынан билдиришти.

Аталган райондун тургундарынын айтымында, 2009-жылы Бөкөнбаев айылына танапташ Төрт-Күл аймагынан жеке турак жай куруу үчүн 102 гектар жер бөлүнүп берилген. Азыр ал жерге 917 үй салынып, миңдеген адам жашап жатат. Бирок ал жер тилкелерине документ берилбегендиктен, таза суу жана электр энергиясы менен камсыз боло элек. Жергиликтүү тургундар ушул кезге чейин мектеп, бала бакча, медициналык тейлөө кызматы сындуу социалдык укуктарынан толук пайдалана алышпайт.

Жолугушуунун жүрүшүндө кезинде бул жерге турак жай куруу үчүн айыл өкмөтү, райондук жана облустук администрациялар тарабынан уруксат берилгени, бирок өкмөт «айдоо жери башка категорияга которулган эмес, мыйзамга туура келбейт» дегендей шылтоолор менен документтештирүү ишин токтотуп койгону белгилүү болду. Ошондон улам жергиликтүү тургундар алардын аракети мыйзам алкагына киргизилип, социалдык көйгөйлөрдүн тезинен чечилишин күтүшүүдө.

Депутат Талантбек Узакбаев депутаттар тобу дал ушул маселеге байланыштуу атайын мыйзам долбоорун иштеп чыгып, ал биринчи окууда кабыл алынганын белгиледи. «Бүткүл өлкө аймагы боюнча 38 194 документтештирилбеген үй бар экен. Мыйзам кабыл алынып калса, 2009-жылдын 31-июлуна чейин курулуп, бирок кандайдыр себептерден улам мыйзамдаштырылбай калган жер тилкелерине документ бериле баштайт. Силердин турак жайларыңар да ошол шартка туура келет экен»,- деди ал.

Автор: Наргиза Бекжанова
Фото: Интернеттен алынды