Алмазбек Атамбаев мамлекеттик телеканалдардын таңкы берүүлөрү үчүн акча бөлдү

Мамлекет башчы Алмазбек Атамбаевдин кеңешчиси Фарид Ниязов 21-апрелде бир катар мамлекеттик телеканалдардын башчылары жана алардын таңкы берүүлөрүнүн продюсерлери менен жолугушуп, аларга президенттин атынан 600 миң сом тапшырды.

Ниязов өлкө башчы тележурналисттердин ишин, өзгөчө таңкы берүүлөрдүн маанисин жогору баалаарын билдирди.

"Бизде бийликти жана мамлекеттик органдардын ишин сындоого көптөгөн объективдүү себептер бар. Бизде кыйынчылыктар көп, бирок алардан арылуу үчүн жарандардын маанайы жакшы болушу керек. Ошондуктан силердин ишиңер баалуу, силер жана силердин таңкы телеберүүдөгү кызматкерлериңер позитивдүү маанай тартуулашат",- деп билдирди Ниязов.

Жолугушуунун соңунда президенттин кеңешчиси мамлекет башчынын атынан катышуучуларга жаңы чыгармачылык ийгиликтерди, өлкөбүздө ар бир таңдын бейпил жана кутмандуу болушун каалады.

Президенттик фонддон бөлүнгөн 600 миң сомдун эсебинен ар бир телеканалга 150 миң сомдон берилгени айтылды.

Автор: Автандил Добулбеков