Ысык-Көлдө кырсыктан улам каза тапкан жарандын туугандары "күнөөлүү айдоочуну милиция коргоп, ишти сотко жеткирбей жатат" дешүүдө

Ысык-Көлдө кырсыктан улам каза тапкан 32 жаштагы Мирбек аттуу жарандын туугандары "күнөөлүү айдоочуну милиция коргоп, ишти сотко жеткирбей жатат" деп арызданып, SUPER.KG порталына кайрылышты. Алардын айтымдарында, кырсык 2014-жылдын 19-мартында Балыкчы-Каракол унаа жолунда саат 20:00 чамасында орун алган.

"Жолдун боюнда бараткан Мирбекти сүзүп кеткен Мерседес-Бенц үлгүсүндөгү жүк ташуучу унаа (мамлекеттик номери B 8269 AL) "Ак-Каз" ишканасына таандык экени бизге белгилүү болду. Жергиликтүү милиция күнөөлүүнү издеп таап, камакка отургузган болчу. Бирок бир нече убакыттан кийин аны бошотуп коюшуптур, унааны да айып жайдан тез эле чыгарышкан экен. Бул ишти бир нече тергөөчү тергеп, эч кандай жыйынтык чыккан эмес",- дешти маркумдун туугандары.

"ИИМге, Башкы прокуратурага, президентке, өкмөткө кайрылганбызда гана биздин ишибиз жанданган, бирок кийин кайра эле тергөө токтотулуп калган. Биздин оюбуз боюнча, күнөөлүү айдоочунун туугандарынын арасында күч түзүмдөрүндө жогорку кызматта иштегендер бар. Алар бул иштин жанданбашына кызыкдар болуп, аны сотко жеткирбей жатышы мүмкүн",- деп арызданышты Мирбектин туугандары.

Автор: Нургазы Аматов