Нарын. Өкмөттүн өкүлү акимдерге шайлоого байланышкан маселелерди чечүүгө 3 күн убакыт берди

Кыргыз Республикасынын өкмөтүнүн Нарын облусу боюнча ыйгарым укуктуу өкүлү К.Муратбеков бүгүн администрациянын жыйындар залында район башчылары менен жыйын өткөрдү. Иш-чарада негизги 3 маселе каралды. Алардын ичинде жакында боло турган жергиликтүү кеңештерге депутаттарды шайлоо, кышка даярдык жана жазга даярдык тууралуу кеп-кеңеш, сунуш, маселелер талкууланды. Мындан сырткары алдыдагы шайлоого болгон даярдык, кээ бир участоктордо шайлоо комиссияларынын түзүлүп бүтө электиги, участоктордогу шарттар, урна, кабиналардын даярдыктары тууралуу эскертүүлөр болду. Өкмөт өкүлү тарабынан милдеттенмелер берилип, 3 күндүн ичинде маселелерди чечүүнү буюрду. Кышка жана жазга даярдык боюнча да бир топ маселелер каралып, көмүр, жылуулук берүү жана жазындагы сел каптоо, өзгөчө кырдаалдардын алдын алуу боюнча тапшырмалар берилди.