Бюджеттин кирешелеринин толбой калышын жоюу максатында өкмөт кандай чечимдерди кабыл алганы белгилүү болду

Бюджеттин кирешелеринин толбой калышын жоюу максатында өкмөт тарабынан жалпы суммасы 19 миллиард сом болгон кошумча булактарды табууга багытталган чечимдер кабыл алынган. Бул тууралуу бүгүн, 24-октябрда Жогорку Кеңештин Бюджет жана финансы боюнча комитетинин отурумунда премьер-министр Сооронбай Жээнбеков билдирди.

Анын айтымында, бул кошумча ресурстарды негизинен төмөнкүлөр түздү: салыктык эмес кирешелер 5 миллиард 542 миллион сом, президенттин кийлигишүүсү менен Орусиядан, Азия өнүгүү банкынан, Европа биримдигинен жана башка донорлордон келген гранттар 4 миллиард 200 миллион сом. "4,5 миллиард сом салыктык кирешелер жана 3 миллиард 700 миллион сом башка гранттар түшпөй калганын баса белгилеп кетишим керек. Ошол эле убакта жогоркуларга кошумча дагы үч мүмкүнчүлүктү жараттык: 5 миллиард 528 миллион сомго кошумча каржылоо ресурстары табылды. Өткөн жылдын казынасынын эсебинде калган каражаттар 5 миллиард 669 миллион сомду түздү. Бюджеттин чыгымдарын оптималдаштыруу жана чыгашаларды кыскартуу 5 миллиард 106 миллион сомго жетти", - деп билдирди өкмөт башчы.

Жыйынтыгында ал кошумча табылган бардык ресурстарды жана бюджеттик чыгашаларды оптималдаштыруунун суммасы 19 миллиарддан ашык сомду түзгөнүн маалымдады.

Автор: Нургазы Аматов