Жаңы коалиция - "Бир бол", КСДП жана "Кыргызстан"

Жогорку Кеңештеги көпчүлүк коалиция КСДП (38 депутат), "Бир бол" (12 депутат) жана "Кыргызстан" (18 депутат) фракцияларынан түзүлдү. Бул тууралуу бүгүн, 3-ноябрда КСДПнын лидери Иса Өмүркулов билдирди.

Анын айтымында, премьер-министр кызматына Сооронбай Жээнбековдун талапкерлиги сунушталды.

Ошентип, башкаруучу коалиция 68 депутаттан турат. Бул коалициянын төрагалыгына Иса Өмүркулов шайланды. Ал эми парламенттик оппозицияга "Ата Мекен" (11 депутат), "Өнүгүү-Прогресс" (13) жана "Республика-Ата Журт" (28) кирет.

Эскерте кетсек, 24-октябрда парламенттеги коалициялык көпчүлүктөн КСДП чыкканы белгилүү болгон. Коалиция КСДП, "Кыргызстан", "Өнүгүү-Прогресс" жана "Ата Мекен" фракцияларынан, ал эми парламенттик оппозиция "Республика-Ата Журт" менен "Бир болдон" турган. Альянска кирген КСДП менен "Кыргызстан" Конституцияны өзгөртүү боюнча референдумду колдошкон, "Ата Мекен" менен "Өнүгүү-Прогресс" бул демилгеге каршы чыгышкан.

Коалицияны түзүүгө мандатты президенттен алган КСДПнын лидери Иса Өмүркулов сүйлөшүүлөрдү "Бир бол" жана "Кыргызстан" фракцияларынын лидерлери менен баштаган. Ал эми РАЖдын лидери Өмүрбек Бабанов менен эки күндөн кийин гана жолугушкан. "Республика-Ата Журттун" лидери Ө.Бабанов фракциясынын коалицияга кирүүсүнө эки-үч маселе тоскоол болуп жатканын айткан.

Автор: Нургазы Аматов
Фото: Нургазы Аматов