"Электр станциялары" ачык акционердик коому Токтогул ГЭСинде авария болгонун тастыктады

15-декабрда Токтогул ГЭСинде кубаттуулугу 300 мегаваттык №2-гидроагрегат анын көмөкчү жабдуусунун жабыркашынан улам пландан тышкары өчүрүлгөн. Бул тууралуу "Электр станциялары" ачык акционердик коомунун басма сөз кызматы бүгүн, 21-декабрда кабарлады.

Маалыматка ылайык, 500 киловаттык кабелдин бузулушунун себеби аныкталууда, ал эми жеринде Токтогул ГЭСинин кызматкерлери, анын ичинде жетекчилери, кабелдик жабдуулар боюнча орусиялык адистер жана Мамлекеттик экологиялык-техникалык инспекциясынын комиссиясы иштеп жатат.

"Электр энергиясы боюнча чектөөлөр жок, ГЭСтердин баары суу-энергетикалык тартипте иштеп жатат. Учурда бардык ГЭСтердин жана Жылуулук электр борборлорунун жалпы кубаттуулугу өлкө боюнча керектөөгө жетет", - деп айтылат маалыматта.

Басма сөз кызматы ЖМКга тараган маалымат боюнча да билдирүү жасаган:

"Компания авария тууралуу маалыматты жашыргандыгы жөнүндө жазылган билдирүүлөр булактын кесипкөй эместигинен кабар берет. Себеби мындай авариялар, жабдуулардын иштен чыккандыгы тууралуу оперативдүү түрдө бардык тиешелүү мамлекеттик органдарга жарыялоо тартибине ылайык айтылат".

Автор: Үмүт Абдраимова
Фото: Интернеттен алынды