Жогорку Кеңештин депутаттары Ак-Ордо жаңы конушунун тургундары менен жолугушту

Жогорку Кеңештин депутаттары Ирина Карамушкина менен Туратбек Мадылбеков бүгүн, 30-апрелде Сокулук районуна караштуу Ак-Ордо жаңы конушунун тургундары менен жолугушуу өткөргөнүн ЖКнын маалымат кызматы билдирди.

Белгилүү болгондой, аталган конушка ичүүчү таза суу чыгарылган эмес, электр энергиясы менен толук камсыз боло элек. Бул көйгөйлөр депутаттар менен жолуккан жергиликтүү жашоочулар тарабынан айтылды. Ошондой эле бүгүнкү күнгө чейин көчөлөр такталбай жатканын кошумчалашты тургундар. Муну менен катар конушка мыйзамсыз курулган турак үйлөр боюнча да сөз болду. Депутат Туратбек Мадылбеков бул маселеде карапайым элдин күнөөсү жок экенин баса белгилеп, "мындай баш аламандыкты уюштурган ошол кездеги жетекчилер жоопко тартылышы керек, ошондо гана мындай окуялар кайталанбайт" деди.

Ал эми депутат Ирина Карамушкина бул боюнча өкмөт тез арада тиешелүү күч түзүмдөрүнүн өкүлдөрүнөн турган комиссия түзүп, иликтөө иштерин жүргүзүп, элдин көйгөйлөрүнүн чечилишине жардам берүүсү керектигин белгиледи.

Автор: Автандил Добулбеков