"Евровидение-2017" сынагында ырчы Жамала ырдап жатканда жамбашын көрсөткөн чуулгандуу пранкер 5 жылга кесилиши мүмкүн

Киевде өткөн "Евровидение-2017" сынагынын финалында ырчы Жамала ырдап жатканда, сахнага чыга калып жамбашын көрсөткөн чуулгандуу пранкер Виталий Седюк 5 жылга кесилиши мүмкүн. Бул тууралуу Украинанын Ички иштер министри Арсен Аваков өзүнүн социалдык тармактагы баракчасына жазып чыкты.

"Евровидение" сынагынын мурунку жеңүүчүсү Жамала сахнада ырдап жаткан кезинде Виталий Седюк сахнага Австралиянын желегин көтөрүп чыгып, шымын чечип, камерага жамбашын көрсөткөн. Ырчы ага көңүл бурбай ырдай берген, ал эми пранкерди күзөт кызматкерлери алып кетишкен.

"200 миллион телекөрүүчүлөргө жамбашын көрсөткөн акмак тууралуу сурамдарга жооп: Седюк-Украинанын жараны. Анын айтымында, биздин Жамала ырдап жатканда, ал "провокация жаратуучу расмий эмес журналист" болгондуктан, өзүнүн хоббисин ишке ашырууну чечкен. Сынактын күзөтчүлөрү жана полиция тарабынан кармалган. Кармоо учурунда каршылык көрсөткөн. Украинанын Кылмыш процессуалдык Кодексинин 208-беренесине ылайык, 72 саатка камакка алынды. Эртең (ред. бүгүн, 15-майда) сот анын ишин 296-берене (бейбаштык) менен карайт", - деген министр.

Анын маалыматына ылайык, бул берене боюнча соттолгондорго айып пул салынат же 5 жылга чейин кесилиши мүмкүн.

Эскерте кетсек, пранкер буга чейин Брэд Питти бетке чаап, актриса Америка Ферреранын көйнөгүнүн этегине кире калып, бутунан кармаган. Ошондой эле Брэдли Куперге, Уилл Смитке жана Леонардо Ди Каприого "чабуул" жасаганы белгилүү.

Пранк – англис тилиндеги "prank" сөзүнөн алынган, "тентектик, тамаша, шакаба" дегенди түшүндүрөт.