14:00 Бишкек шаарындагы Биринчи Май райондук соту Садыр Жапаровдун ишин кароону баштады. Конвойдун коштоосунда Садыр Жапаров сот залына алынып келинди. Соттук процесс ачык жүрүп жатат. Жактоочу Шарабидин Токтосунов: “Садыр Жапаровдун иши коомчулукта өтө чоң резонанс жараткан соттук иш. Бүгүн жалпыга маалымдоо каражат өкүлдөрү соттук жыйынга катышуусу маанилүү, эл баарын ачык көрүшү керек. Ошондуктан соттук ишти ачык жүргүзүү өтүнүчүбүздү канааттандырып берүүңүздү өтүнөм”, - деди.
14:14 Бул пикирди Жапаровдун башка адвокаттары да колдошту. Соттолуучу Садыр Жапаров: “Акыркы мезгилде бүт коомчулук күбө. Кандайдыр бир кылмыш иши саясатчыларга буюртма менен козголгондо күбөлөрдү жана башкаларды кыйноо жолу менен камап алып жашыруун жол менен соттоп жибергендигине күбө болуп жатабыз. Бул иште дагы сиздер эгерде журналисттерге видеокамераларга тарттырбай, бут тосуп тоскоолдук кыла турган болсоңуздар, бул ишти да буюртма экендигин өзүңүздөр далилдеп коёсуздар. Ошондуктан ачык тартышсын, менин күнөөм болсо эл билсин, баарын көрсүн, менде күнөө болсо эл айтсын. Азыр бийликке, сотко, прокурорлорго эч ким ишенбей калган заман. Маалымат каражаттары башынан аягына чейин чагылдырсын. Азыр мен түрмөдө жаткан күбөлөргө чейин Жапаровго каршы көрсөтмө бер деп кыйноого алганын билдим. Ошол себептен жактоочуларымдын журналисттер баштан аяк катышсын деген өтүнүчүн колдойм”.
Садыр Жапаровдун сөзүнөн кийин залдагы кол чапкан тарапташтарына судья Эмил Кайыпов: “Дагы бир жолу кол чапсаңыздар, анда мен мыйзамдуу укугумдан пайдаланып сот залынан чыгарып салууга акым бар. Сот залында кол чабууга тыюу салынат”, - деп эскертүү берди.
Мамлекеттик айыптоочулар соттук иш ачык болгондугуна каршылыгы жок экенин билдирип, журналисттерге гана тартса болорун, ал эми уюлдук телефондорго тарткандарга уруксат бербеш керектигин эскертти.
Мамлекеттик айыптоочунун сөзүнө жактоочу Токтосунов каршы чыгып, мыйзамда журналисттер жана жөнөкөй адамдар деп бөлүнбөөрүн, ачык болгондон кийин ким кандай чагылдырса өз эрки экендигин айтты.
14:20 Соттук отурум башталганына 20 мүнөттөй болуп калганда, сот залынын эшигин сыртта кире албай калган журналисттер каккылашып, имаратты милиция курчоого алып көпчүлүгүн киргизбей жатышкандыгын айтышты.
Судья соттук иш башталып калгандыктан конвойго эшикти бекитип эч кимди киргизбөөнү айтты. Сыртта калган айрым журналисттерге сотко катышууга мүмкүнчүлүк берилген жок.
Ал эми Судья "соттун даярдоо ишин гана фото, видеого тартууга бүгүнкү отурумда уруксат берилет, кийинкиде берилбейт", - деди.
14: 25 Соттук отурумда 5-жактоочу Акин Токталиевдин бүгүнкү отурумга келбей калганына токтолушту. "Ал 25-марттан бери жактоочу болуп келе жатат. Ошондуктан отурумду кийинкиге жылдырууну өтүнөбүз", - дешти жактоочулар. Буга "4 жактоочу, 1 укук коргоочу сот залында отурушат. Кийинкиге жылдырууга эч кандай себеп жок, өтүнүчтү четке кагам", - деди сот.
Соттук жыйында Жапаровдун 4 жактоочусу Акин Токталиевге кабар жетпей келбей калгандыгын жана иш менен толук таанышууга убакыт берилбегендигин жүйөө кылып, сотту кийинкиге жылдырууну өтүнүштү.
14:35 Судья өтүнүчтү канааттандырып, кийинки соттук жыйынды 12-июнь күнү саат 14:00гө белгиледи.
14:59 Садыр Жапаровдун жактоочуларынын бири Шарабидин Токтосунов буларга токтолду: "Соттук отурум бүгүндөн башталды. Соттун төрагасы бир нерсеге кызыкдар экендигин билдирип журналисттердин процессти сүрөткө жана видеого тартуусуна каршылыгын билдирди. Биздин журналисттерге уруксат берилишин сураган өтүнүчүбүздү ал тургай мамлекеттик айыптоочулар да колдошту. Бирок бир гана сот макул болбой даярдоо бөлүмүн гана тартууга уруксат берип, соттук териштирүүнү тартууга уруксат бербей койду. Кийинки соттук отурум 12-июнга жылдырылды. Анда дагы ЖМКлардын өкүлдөрүнө фото, видеого тартууга уруксат берилди, соттук отурум ачык өтмөкчү".
Эскерте кетсек, 2017-жылдын 25-мартында Садыр Жапаров Казакстандан Кыргыз мамлекетине киргенде аны чек арадан УКМКнын кызматкерлери кармап кеткен. Ал "бейбаштык", "бийлик өкүлүнө карата зордук-зомбулук көрсөтүү", "барымтага алуу" жана башка беренелер боюнча айыпталууда. 26-мартта Садыр Жапаров Биринчи Май райондук сотунун чечими менен тергөө бүткүчө Бишкектеги №1-тергөө абагына камалган. 6-апрелде Бишкек шаардык соту райондук соттун чечимин күчүндө калтырган. Ал эми 24-апрелде Бишкектин Биринчи Май райондук соту Жапаровду камакта кармоо мөөнөтүн 28-майга чейин узарткан. Бул чечимди Бишкек шаардык соту күчүндө калтырган болчу.
