Феликс Кулов түзгөн программасын колдогон талапкерди шайлоодо колдоорун айтты

“Ар-Намыс” партиясынын лидери Феликс Кулов 3 бөлүктөн турган программа түзүп, аны колдогон талапкерди президенттик шайлоодо колдоорун билдирди.

“Соттук реформага өзгөртүүлөрдү киргизүү зарыл, бул жерде толгон маселелер бар. Ал Жогорку Кеңештеги сотту тандоо кеңешинен башталат. Анткени мыйзамдагы чабалдыктан тандоо кеңеши аркылуу бул кызматка тажрыйбасыз адамдар келип жатат. Мен өзүмдүн билим тажрыйбам менен да сот болуп иштеп кетем деп айта албайм. Бул үчүн кеминде 5 жылдык адвокаттык болсо да тажрыйба керек.

Улуттук коопсуздук кызматы бир эле саясий же терроризмге байланыштуу коопсуздукту эмес, энергетикалык, экономикалык коопсуздуктарды да карашы керек. Бул үчүн элдик акционерлер кеңешин түзүү абзел.

Президент партияга көз каранды же партиялык иштерге тиешеси жок болушу керек. Журт башчысы деген партиянын көзүн карап, анын сызган сызыгы менен эмес, элдин башында туруп, көз карандысыз жол баштоочу болууга тийиш”, - дейт Кулов.

Феликс Кулов учурда бир канча талапкерлер менен макулдашып, сүйлөшүүлөргө барганын айтты.

Автор: Мунарбек Жоргомов