Баткенде 5-июлда дайынсыз жоголгон 5 баланын атасын издөө иши токтотулду

Баткен районундагы Кыштут айыл аймагына караштуу Таян айылынын 45 жаштагы тургуну 5-июлдан бери дайынсыз болуп изделип жаткан. ӨКМнын маалымат кызматы издөө иштери токтотулганын 19-июлда кабарлады. Буга 18-июлда анын туугандары тарабынан издөөнү токтотуу тууралуу жазып берген каты негиз болгон.

Маалым болгондой, изделип жаткан жаран айылдан чыгып тоо тарапка басып кетип ошол бойдон кайрылып келген эмес. Алгач туугандары өз алдынча издөөгө алып, натыйжа болбогонунан улам Өзгөчө кырдаалдар министрлигинин райондогу куткаруу тобуна кайрылып издөөгө жардам берүүнү сурашкан. Андан кийин куткаруучулар тобу, милиция кызматкерлери жана жергиликтүү эл издөө иштерин жүргүзүп таба албай келишкен. Табылбай жаткан жарандын 5 баласы бар экендиги айтылган.

Автор: Жамалидин Парманкулов