Ош ОИИБи: "Кара-Кулжа районунда шайлоо бюллетенин эшикке алып чыгып кеткен аялдан түшүнүк кат алынып, коё берилген"

Кара-Кулжа районунда кечээ, 15-октябрда шайлоо бюллетенин эшикке алып чыгып, бырыштырып салган аялдан түшүнүк кат алынып, коё берилгенин Ош облустук ички иштер башкармалыгынын басма сөз катчысы Жеңишбек Ашырбаев SUPER.KG порталына билдирди.

"Шайлоо бюллетенин сыртка алып чыгып кеткен аялдан жана окуяга күбө болгондордон түшүнүк кат алынып, үйүнө коё берилген. Ал кандай жоопкерчиликке тартыла тургандыгы Шайлоо кодексиндеги мыйзамдардын талабына ылайык болот", - деди ал.

Белгилей кетсек, кечээ Ош облусуна караштуу Кара-Кулжа районундагы №5009-шайлоо тилкесинде А.С. аттуу жергиликтүү тургун бюллетенин сыртка алып чыгып жараксыз абалга келтиргенин Борбордук шайлоо комиссиясы билдирген. Анын сүйлөгөнү жазылган видеодо ал талапкер Өмүрбек Бабановго добушун берсе, шайлоо тилкесиндегилер Сооронбай Жээнбековго тапшыруусун талап кылгандыктан бул кадамга барганын түшүндүргөн.

Автор: Саадат Токтоболот кызы