Ирина Карамушкина "Коопсуз шаар" долбоору боюнча мурдагы ички иштер министри жоопко тартылбаганын айтты

Депутат Ирина Карамушкина мурдагы ички иштер министри Мелис Турганбаев боюнча маселени Башкы прокуратура карап чыгышы керектигин айтты. Бул тууралуу ал бүгүн, 24-октябрда парламент комитетинин жыйынында билдирди.

“Коопсуз шаар” долбоору боюнча тендерди үзгүлтүккө учураткан Мелис Турганбаев кызматтан кетип, унчукпай жүрөт. Ким жоопкерчиликке тартылышы керек? Тендерге өзүм катышкандыктан таза, ачык-айкын өттү деп айта алам. Бирок тендерди үзгүлтүккө учуратты. Эмнеге Башкы прокуратура бул маселе боюнча карабайт. Жол кырсыгынан каза тапкандар боюнча жоопкерчиликти ким тартат?” - деди депутат.

Ички иштер министринин орун басары Курсан Асанов аталган долбоор боюнча соттук иштер бүткөнүн айтып, “Таза коом” долбоору аркылуу “Коопсуз шаар” долбоору ишке ашырыла турганын кошумчалады.

Автор: Жылдыз Джускембаева