Жалал-Абадда шаардык кеңештин коалициясы акыры түзүлдү

Жалал-Абад шаардык кеңешинде коалиция түзүлдү. Бул тууралуу SUPER.KG`ге шаардык кеңештеги коалициялык көпчүлүктүн лидери Сайдулла Чымбердиев билдирди.

"Жалал-Абад шаардык кеңешинде КСДП, "Ата-Журт", "Республика", "Мекеним Кыргызстан" фракцияларынан 19 депутаттан турган коалиция түзүлдү. Көпчүлүк коалициянын аты "Ийгилик" деп аталат.

Ал эми шаардык кеңештеги "Өнүгүү" жана "Кыргызстан" фракциялары оппозициялык азчылыкта калды. Кийинки сессия 8-ноябрда болот. Бул күнү шаардык кеңештин төрагасын жана туруктуу комиссияларды бекитебиз", - деди коалициянын төрагасы.

Эске сала кетсек, Жалал-Абад шаардык кеңеши алгач 2016-жылдын 11-декабрында шайланып, шаар башчысын шайлоодо бир чечимге келбей быйыл апрель айында тараган. Депутаттарды шайлоо 28-майда мөөнөтүнөн мурда кайра белгиленип, анда КСДП, “Кыргызстан”, “Мекеним Кыргызстан”, “Республика”, “Өнүгүү”, “Ата Журт” партиялары шаардыктардын колдоосун тапкан. Депутаттар жарым жылга чейин коалиция түзө албай келген болчу.

Автор: Мунарбек Жоргомов