Дастан Бекешев СИЗОлорду депутаттар үчүн эле эмес, жарандар үчүн да оңдоо сунушун айтты

Бүгүн, 27-октябрда КСДП фракциясы Кыйноолордун алдын алуу боюнча улуттук борбордун маалыматын укту. Анда депутат Дастан Бекешев депутаттар жаткан убактылуу кармоочу жайлардын шарты жакшырганын айтып, башка да убактылуу кармоочу жайларды оңдоп-түзөөдөн өткөрүүнү сунуштады.

“Биз Кыйноолордун алдын алуу боюнча борбордун маалыматын карап жатабыз. Бул боюнча чечим кабыл алардан мурун бир сунуш киргизсек. Убактылуу кармоочу жайларды оңдоп-түзөөгө каражат бөлүш керек. Азыр бир окуя эсиме түшүп жатат. V чакырылыштагы бир депутатты УКМКнын абагына алып барганда: “Мен бюджет комитетине ушул СИЗОнун курулушуна каражат бөлүү боюнча сунуш бергенге үлгүрбөй калдым” деп айткан эле. Кийинчерээк депутаттар ал жакка тез-тез түшүп, ал СИЗОнун шарттары жакшырып, тез эле оңдоп-түзөөдөн өттү. Мен убактылуу кармоочу жайлардын шартын жакшыртуу сунушун айткам. Бул ал жакка алып барылган депутаттар үчүн эмес, ошол жакта жаткан жалпы адамдар үчүн. Ал жакка күн сайын ар түрдүү жарандар туш болууда. Ушул сунушту фракция чечимине киргизип койсоңуз”, - деди Бекешев.

Депутаттар Кыйноолордун алдын алуу боюнча улуттук борбордун маалыматын кабыл алып, жалпы жыйынга алып чыгуу боюнча чечимге келишти. Фракция лидери Иса Өмүркулов депутат Дастан Бекешевдин сунушу фракциянын чечимине тиркелерин айтты.

Автор: Мунарбек Жоргомов
Фото: Анна Яловкина