Бишкекте шайлоо системи талкууланууда

Бүгүн, 14-ноябрда Бишкекте "Кыргыз мамлекетиндеги шайлоо системи жана аны реформалоонун перспективасы" деген аталыштагы тегерек стол өтүүдө. Ага экс-депутаттар, укук коргоочулар жана юристтер катышууда. Анда шайлоо системиндеги көйгөйлөр жана аларды чечүү жолдору талкууланып жатат.

Укук коргоочу Динара Ошурахунова 15-октябрда өткөн президенттик шайлоодо мыйзам бузуулар болгонун, бирок ага эч кандай чектөөлөр каралбай калганын белгиледи. Анын айтымында, шайлоочулардын укуктарын бузган тараптарга чара көрүлүшү керек эле. Ошондой эле ал шайлоочулардын добуш берүүсү толук камсыздалбай калганына токтолду.

"Биометрикалык каттоодон өткөн жарандар кайсы жерде болбосун добуш берүүсүнө мүмкүнчүлүк бар болчу. Бирок андай болгон жок. Чет өлкөдө жүргөн канчалаган жарандарыбыз добуш бере албай калышты, кээ бири ишенимдин жоктугунан шайлоого барышкан жок. Ошол эле учурда көпчүлүк жарандар биометрикалык каттоодон өткөн эмес. Бул маселени чечүү үчүн бийлик тарабынан аракеттер көрүлбөй жатат", - деди Ошурахунова.

Андан сырткары шайлоочулардын талапкер тууралуу маалымат алуусуна бир ай жетишсиз экенин айтты. "Талапкерлер үчүн бир айлык шайлоо өнөктүгү жетиштүү, бирок шайлоочуларга бул мөөнөт жетишсиз болууда. Себеби толук маалымат алууга жетишпей калышууда", - деди ал.

Автор: Жамалидин Парманкулов
Фото: Жамалидин Парманкулов