Кинооператор Санжар Абдыжапаров 4 айдан бери Кудрет Тайчабаровдон камерасын ала албай убара тартып жатканын айтты

Өзүн журналист, акын, актёр катары сынап жүргөн Кудрет Тайчабаров белгилүү режиссёр Эрнест Абдыжапаровдун уулу, кинооператор, клипмейкер Санжар Абдыжапаровдун фотокамерасын кайтарып бере элек. Бул тууралуу Санжар Абдыжапаров SUPER.KG порталына айтып берди.

Буга чейин Кудрет Тайчабаров клипмейкердин Canon mark III үлгүсүндөгү фотокамерасын алып, кайтарып бербей жаткандыгы маалымдалган.

Абдыжапаровдун айтымында, Кудрет Тайчабаров анын камерасын алып кеткенине 4 ай болду.

"Мен август айында Бишкек шаардык октябрь РИИБине, райондук прокуратурага арыз жазгам. Кийин шаардагы кафелердин биринен Кудретти жолуктуруп калып, милицияга кабар берип өзүм кармап бердим. Бирок милиция аны кайра коё берди. Акча сунуштаганбы, эмнеге аны коё беришти мага белгисиз. Милициялардын айтымында, Кудрет унаасы менен жолдо баратып бейтааныш кишинин унаасын сүзүп алыптыр. Ал киши "Унаам оңдолгондон кийин берем", - деп менин камерамды алып коюптур. Бирок Кудрет өзү мага камераны сүрөткө тартып жиберип, "камера менде милициядан арызыңды алсаң берем" деп жазды. Мен андан бул убакыт ичинде мага канча зыян келсе, ошону төлөп берүүсүн талап кылам", - дейт ал.

Санжар Абдыжапаров учурда жумуш үчүн башка бирөөлөрдөн күнүнө 1,5 миң сомдон ижарага камера алып иштеп, зыян тартып жатканын белгиледи.

"4 ай ичинде бул жабдык менен аз дегенде 2 миң доллар киреше тапмакмын. Укук коргоо органдары тарабынан айта турган деле аракеттер көрүлбөй келет. Кудреттин камераны алган ижарасы эле 130 миң сомго жетти. Мен мынча акчаны төлөсүн дебейм 1000 доллар, анан камерамды берсин, болду, иш жабылат. Мен канча убара тарттым, моралдык чыгымдарым үчүн деле компенсация талап кылсам да болмок, бирок антпейм", - деп кошумчалады оператор.

Ал эми Кудрет Тайчабаров жүйөлүү себептер болбосо камера үчүн мынчалык жаман көрүнүүнү өзү да каалабай турганын айтат. Анын билдирүүсүнө ылайык, камера учурда башка кишинин колунда.

"Мен июль айында жол кырсыгына кабылдым, бейтааныш кишинин унаасын сүзүп алгам. Ал унааны калыбына келтирип бергенге чейин камераңды алам деп камераны алып койду. Буюрса, унаа оңдолуп бүтөйүн деп калды. Камераны кайтарып берем, эгер Санжар акча талап кылса колумдан келишинче акча да кошуп берем. Бирок мен аны иштетип каражат тапкан жокмун. Жакында эле азырынча иштетип тур деп башка камера бергем. Милицияларга да абалымды айтып түшүндүргөм. Санжарга камеранын сүрөтүн өзүм тартып жөнөткөн эмесмин. Аппаратты жоготкон жокмун деп ишендирүү үчүн камераны алган кишиден сүрөтүн тартып жөнөтүүсүн өтүнүп, ошол сүрөттү салгам", - деди Тайчабаров.

Бишкек ШИИББинин маалыматына караганда, учурда бул боюнча кызматтык иликтөө иштери жүрүп жатат, бирок кылмыш иши козголо элек.

"Санжар Абдыжапаров тарабынан жазылган арыздын негизинде Октябрь райондук ички иштер бөлүмү тарабынан кызматтык иликтөө иштери жүрүп жатат. Аны тергөөчү суракка алып, өзүнө, туугандарына айтып, камераны кайтарууга милдеттендирген.Тайчабаров Санжарга карыз буюмун алып келип берүүнү убада кылган. Бирок көп убакыт өтүп кетти. Эгер ал убадасын аткарбаса жакынкы арада Тайчабаровдун үстүнөн кылмыш иши козголот", - деп айтылат ШИИББинин басма сөз кызматынын маалыматында.