"ЭЛДИК КАБАРга" жооп: Патрулдук милиция Оштогу Мерседес менен экскаватордун катышуусундагы кырсыктын чоо-жайын айтып берди

Ош шаарында катуу ылдамдыкта бара жатып экскаваторду аркасынан сүзүп алган Мерседестеги 3 адам жаракат алып ооруканага жеткирилди. Бул тууралуу бүгүн, 18-ноябрда Ош облусундагы Патрулдук милициянын басма сөз кызматынан билдиришти.

"Окуя кечээ, 17-ноябрда саат 21:00 чамасында болгон. Анда Ош шаарын көздөй бара жаткан Мерседес 200 үлгүсүндөгү жеңил автоунаанын айдоочусу унааны башкара албай калып, алдында бара жаткан экскаваторду сүзүп алган. Натыйжада Мерседестин айдоочусу жана 2 жүргүнчүсү жаракат алып, Ош шаардык ооруканасына жеткирилген. Экскаватордун айдоочусу жаракат алган жок. Жеңил унаа менен экскаватор айып аянтчасына токтотулуп, учурда иликтөө иштери жүрүп жатат", - дешти милициядан.

Эскерте кетсек, буга чейин окурман SUPER.KG порталына аталган кырсык тууралуу кабарлаган.

Автор: Кенжебай Сатканалиев