Сооронбай Жээнбеков Улуттук банктын төрагасын кабыл алды

Бүгүн, 28-ноябрда президент Сооронбай Жээнбеков Улуттук банктын төрагасы Кубанычбек Кулматовду кабыл алды. Бул тууралуу президенттик аппараттын басма сөз кызматы билдирди.

Маалым болгондой, жолугушууда Кулматов Жээнбековго Улуттук банк аткарып жаткан жумуштар, улуттук валютанын алмаштыруу курсунун кескин өзгөрүшүнө жол бербөө, банк жана төлөө системдеринин коопсуздугун камсыздоо жана инфляциянын деңгээлин ооздуктоо аракеттери боюнча көрүлүп жаткан чаралар жөнүндө маалымат берди.

Мындан тышкары Кубанычбек Кулматов президентке Улуттук банк накталай эмес эсептөөгө өтүү программасын ишке ашыруу боюнча үчүнчү баскычка өтүп жатканын билдирди. “Бардык банк инфраструктурасы - терминалдар, банкоматтар аймактарга жайгаштырылат” деп билдирди Улуттук банктын төрагасы. Анын айтымында, бүгүнкү күндө дээрлик бардык мамлекеттик жана муниципалдык органдар айлык маянаны банк карталарына которуу системине өтүштү. Буга байланыштуу аймактарда акча каражаттарын накталай алуу жана тейлөө кызматтарына төлөө боюнча белгилүү бир кыйынчылыктар байкалууда.

Президент Сооронбай Жээнбеков насыя рыногун “узун акча” менен камсыздоо жана ресурстардын баасын төмөндөтүү жолу менен узак мөөнөттүү экономикалык өсүшкө жана ишкерлик активдүүлүккө жардам берүү иштерин активдештирүү зарылчылыгын белгиледи. Муну менен бирге банк ишине жаңы технологияларды киргизүү жана ошондой эле накталай эмес эсептөөнүн үлүшүн көбөйтүү максатында өлкөнүн алыскы аймактарында инфраструктураны өнүктүрүү үчүн шарттарды түзүү зарылдыгын белгиледи.

Ошондой эле ал кайра иштетүү өнөр жай тармагына насыя берүүнүн көлөмүн көбөйтүү милдетин тапшырды. Мамлекет башчысы ар кандай спекуляциялардын жана улуттук валютанын алмашуу курсунун кескин өзгөрүшүн болтурбоо максатында ички валюталык рынокто абалды жакшылап карап, инфляциянын деңгээлин ооздуктоо боюнча тиешелүү чараларды көрүшү керектигин айтты.

Автор: Нургазы Аматов
Фото: Султан Досалиев