Патрулдук милиция: "Бишкекте жол эрежесин бузуп, адепсиз жаңсоо кылган айдоочу кармалды"

Бишкекте жол эрежесин бузуп, адепсиз жаңсоо кылган айдоочу Урмат Токтоназаров кармалды. Түшүнүк кат жазылып алынган соң ал кайра коё берилген. Бул тууралуу бүгүн, 29-ноябрда Бишкек ШИИББи боюнча Патрулдук милиция башкармалыгынан билдиришти.

Маалыматка караганда, Урмат Токтоназаровго каршы тилкеге чыкканы, терезелерин караңгылатып алганы, атайын сигнал орнотуп жана жасалма номер тагып алганы үчүн административдик протокол толтурулган.

Айта кетсек, 28-ноябрь күнү саат 14:00 чамасында Л.Толстой көчөсүндө белгисиз айдоочу терезелери караңгылатылган жана атайын сигнал орнотулган Тойота Ленд Крузер унаасы каршы тилкеге чыгып жол эрежесин бузган. Андан сырткары айдоочу аны видеого тарткан жаранга колунун ортоңку манжасын көрсөтүп, белгисиз тарапка кеткен.

Видеону экс-президент Роза Отунбаеванын уулу, жарандык активист Атай Садыбакасов каршысындагы машинанын рулунда болуп тартып алган.

Бишкек ШИИББи боюнча Патрулдук милиция башкармалыгы терезелери караңгылатылган жана атайын сигнал орнотулган Тойота Ленд Крузер унаасынын айдоочусу 1996-жылы туулган А.А. кармалганын билдиришкен.

Бирок кийин социалдык тармактын колдонуучуларынын жардамынын аркасында видеодогу айдоочу менен Патрулдук милиция кармаган айдоочу эки башка адам экени белгилүү болуп, жол эрежесин бузган учурда унааны Урмат Токтоназаров башкарып баратканы аныкталган.

Ал эми Урмат Токтоназаров SUPER.KG порталына окуянын чоо-жайын айтып берген. Ошондой эле ал Патрулдук милицияга өзү барып, түшүнүк кат жазганын да билдирген.

Автор: Бекжан Рыскулов