Бишкекте "жол эрежесин бузуп, экс-президент Роза Отунбаеванын уулу Атай Садыбакасовго адепсиз жаңсоо кылган" делген айдоочу Урмат Токтоназаров SUPER.KG порталына окуянын чоо-жайын айтып берди.
"Жолдо баратсам, КамАЗ жолду жаап бузулуп калыптыр. Күтүп отура бермек белем, анан каршы тилкеге чыктым. Ошол учурда Мерседес маркасындагы машина, бурулуп келип менин жолумду тороп калды. Жиним келип атайын сигналды иштетип, сөгүп кетип калгам. Каршы тилкеге чыгып, жол эрежесин бузганымды моюнума алам.
Машина өзүмө таандык, сатып алгам. Ишеним каттын негизинде айдап жүрөм. Үйгө токтотуп койсом иним айдап кетип калыптыр. Ал эми атайын сигналды кечээ күнү эле койгом. Ага эч кандай уруксат алган эмесмин.
Ошондой эле мени "Кулатуу Эртаймаш" федерациясынын президенти Руслан Кыдырмышевдин иниси, айдоочусу деп жатышат. Спортко жакын болгонумдан Кыдырмышевди сыртынан эле тааныйм. Кээ бир учурларда жардам берип койчумун. Жогорку Кеңештин төрагасы Дастан Жумабековдун иниси дегендер да бар экен. Чынында аны менен эч кандай байланышым жок. Ал Таластан болсо, мен Жалал-Абаддан болом", - деди Токтоназаров.
Айта кетсек, 28-ноябрь күнү саат 14:00 чамасында Л.Толстой көчөсүндө белгисиз айдоочу терезелери караңгылатылган жана атайын сигнал орнотулган Тойота Ленд Крузер унаасы каршы тилкеге чыгып жол эрежесин бузган. Андан сырткары айдоочу аны видеого тарткан жаранга колунун ортоңку манжасын көрсөтүп, белгисиз тарапка кеткен.
Видеону экс-президент Роза Отунбаеванын уулу, жарандык активист Атай Садыбакасов каршысындагы машинанын рулунда болуп тартып алган.
Бишкек ШИИББи боюнча Патрулдук милиция башкармалыгы терезелери караңгылатылган жана атайын сигнал орнотулган Тойота Ленд Крузер унаасынын айдоочусу 1996-жылы туулган А.А. кармалганын билдиришкен.
Бирок кийин социалдык тармактын колдонуучуларынын жардамынын аркасында видеодогу айдоочу менен Патрулдук милиция кармаган айдоочу эки башка адам экени белгилүү болгон.
Ал эми аталган Бишкек ШИИББи боюнча Патрулдук милиция башкармалыгынын басма сөз катчысы Таалай Бугубаев интернет колдонуучулары тарабынан айтылган күмөндөр боюнча "Биз машинаны таап, токтоткондо рулда 1996-жылы туулган А.А. отурган. Ал "рулда мен болчумун, номерди таап алгам" деп жатат", - деди.
