Сооронбай Жээнбеков Башкы штабдын жетекчиси Райымберди Дүйшөнбиевди кабыл алды

Бүгүн, 4-декабрда президент Сооронбай Жээнбеков өлкөнүн Куралдуу күчтөрүнүн Башкы штабынын жетекчиси Райымберди Дүйшөнбиевди кабыл алды. Бул тууралуу президенттик аппараттын басма сөз кызматы билдирди.

Маалыматка ылайык, жолугушуунун жүрүшүндө мамлекет башчысына өлкөнүн куралдуу күчтөрүн өнүктүрүү, башкаруу системин жакшыртуу боюнча аткарылып жаткан иштер тууралуу маалымат берилди.

Сооронбай Жээнбеков мурдагы президент Алмазбек Атамбаев Кыргыз мамлекетинин куралдуу күчтөрүндө бир катар жакшы реформаларды аткарып, материалдык-техникалык жана аскердик камсыздоону жакшыртканын белгиледи. "Эми бизде күчтүү, жакшы жабдылган армиябыз бар. Өлкөнүн коргонуу жөндөмүнө ишенимдүү боло алабыз. Мында республиканын күч түзүмдөрүнүн органдарынын экономикалык көйгөйлөрүнө өзгөчө көңүл бөлгөн Алмазбек Атамбаевдин эмгеги чоң. Аскер кызматкерлерин социалдык жактан коргоо, республиканын бардык аймактарында жаңы жана заманбап турак жайларды куруу боюнча жумуштар уланат", - деди Жээнбеков.

"Укук коргоо органдарынын жана сот тармагынын ишмердигиндеги айрым коррупциялык көрүнүштөр нааразычылыктарды жана коомчулуктун сын-пикирлерин жаратууда. Бул жактагы коррупцияны жоюп, алардын негизги милдети жарандардын жана ишкерлик тармактын кызыкчылыктарын коргоо болушу керек. Биз бийликтин бардык бутактарындагы коррупция менен аёосуз күрөштү улантабыз", - деди президент.

Автор: Жылдыз Джускембаева
Фото: Султан Досалиев