Бишкекте бардык коммуналдык төлөм кагаздары абоненттерге бир конвертке салынып, чогуу жөнөтүлө турган сынактык долбоор башталды

"Кыргыз почтасы" мамлекеттик ишканасы "Гибриддик почта" деп аталган сынактык долбоорду баштады. Бул тууралуу бүгүн, 8-декабрда Мамлекеттик каттоо кызматынын маалымат катчысы SUPER.KG порталына билдирди.

Берилген маалыматка ылайык, долбоорду сынаш үчүн Бишкек шаарындагы 5 миң абоненти бар 5-кичи район тандалып алынган. Долбоордун сынактык мөөнөтү 1-апрелге чейин улантылат.

"Таза коом" долбоорунун алкагында калкка ыңгайлуу болуш үчүн "Гибриддик почта" ишке киргизилди. Мында суу, электр энергиясы, газ, таштанды, айтор бардык коммуналдык төлөм кагаздары абоненттерге бир мезгилде, 1 конверттин ичинде жөнөтүлөт. Эми абоненттер мурдагыдай ар бир төлөм кагаздарын бирден күтүп, чогултпайт. Мындай ыкма абоненттер үчүн да, коммуналдык кызмат көрсөткөн ишканалар үчүн да ыңгайлуу", - дейт Мамлекеттик каттоо кызматынын маалымат катчысы.

Ал кошумчалагандай, өткөн айдагы төлөмдөр кечээ, 7-декабрда толук чыгарылып бүттү, эми таратыла баштайт.

Бирдиктүү коммуналдык төлөм тууралуу кызыктырган суроолорго жооп берүү үчүн "Кыргыз почтасы" мамлекеттик кызматы 1929 кыска номери жана +996 703 200 003 WhatsApp номери иштей тургандыгын жарыялайт.

Автор: Кызжибек Раимова