Донорлор Ысык-Көлдө сүт тармагын өнүктүрүүгө 5 миллион доллар берет

Донорлор Ысык-Көл облусунда сүт тармагын өнүктүрүүгө 5 миллион доллар берет. Бул тууралуу 11-декабрда Жогорку Кеңештин агрардык саясат, суу ресурстары, экология жана регионалдык өнүктүрүү боюнча комитетинин жыйынында айыл чарба, тамак-аш жана мелиорация министри Нурбек Мурашев билдирди.

“Долбоордун наркы 5 миллион доллар. Бул эл аралык өнүктүрүү ассоциациясы тарабынан берилет. Долбоордун биринчи этабы 3 жылдын ичинде ишке ашат. 5 миллион доллардын 2,25 миллиону грант, калган 2,75 миллион доллар насыя иретинде берилип жатат. Бул насыя жылына 0,75 пайыз менен 38 жылга каралган”, - деди Мурашев.

Долбоор Ысык-Көл облусунда сүт тармагын өнүктүрүү, тоют өндүрүү, ветеринардык кызмат көрсөтүү жана дыйкандарга инвестициялык колдоо көрсөтүүнү көздөйт.

Комитет мүчөлөрү долбоорду биринчи окууда жактырышты.

Автор: Мунарбек Жоргомов