ЖЫЛНААМА, 13-ДЕКАБРЬ: Жогорку Кеңештин эркин депутаты Жанар Акаев 31 жашка чыкты

"Апам азыр деле мени сагынып айылдан келип турат. Дайыма "балам, таза иштегин, элдин акчасын уурдаба" деп айтат".

"Журналисттик жумуш менен жети дубанды, айыл-кыштактарга чейин кыдырдым. Элдин баары мени "өз бала" деп кабылдашат".

Мындан 31 жыл мурун, 1986-жылы 13-декабрда Ош облусунун Алай районуна караштуу Кабылан-Көл айылында Жогорку Кеңештин VI чакырылышынын депутаты Жанар Акаев жарык дүйнөгө келген. 2009-жылы Ош мамлекеттик университетинин журналистика факультетин аяктаган. Алгач журналист болуп 2-курс кезинде ОшМУнун гезитинде иштеген, көп өтпөй окуу жайдын телеберүү бөлүмүнө өткөн.

2008-жылдан тарта "Азаттык" радиосунда кабарчы болуп иштеген.

2010-жылы Япониянын Токио шаарында өткөн Азия мамлекеттеринин журналисттери үчүн уюштурулган сынакта 2-орунду багындырган.

2011-жылы "Евразиянын алтын калеми" сыйлыгына татыктуу болуп, ал эми 2014-жылы Мелис Эшимканов атындагы коомдук фонддун "Курч калем" сыйлыгын алган.

2015-жылы 2-февралда Кыргыз Республикасынын президентинин басма сөз катчысы болуп дайындалган. Ошол эле жылы 27-августта Жанар Акаев парламенттик шайлоого катышуу үчүн кызматынан кетүүгө арыз жазган. Ал эми 4-октябрда өткөн парламенттик шайлоодо КСДПдан Жогорку Кеңештин VI чакырылышынын депутаты болуп шайланган.

2017-жылдын 24-мартында КСДП Жанар Акаевди фракциядан чыгарган.

Белгилей кетсек, Жанар Акаев "Супер-Инфо" гезитинин тандоосу боюнча "2010-2011-жылдардын супер телеалпаруучусу" наамын жеңип алган. Учурда депутат үй-бүлөлүү, бир уулдун атасы.

13-декабрдын жылнаамасы.