Бири-бирине удаалаш кош жакшылыктар жашоосунан орун алган ырчы мырза Омар саналуу мүнөттөрдөн кийин SUPER.KG порталынын кезектеги коногу болот. Ал Алматы шаарында болуп өткөн "Silk Way Star" эл аралык ыр сынагына Кыргыздын атынан катышып 1-орунга ээ болуп, жалпы күйөрмандарына кубаныч тартуулады. Ал эми 2-декабрда Диана аттуу бийкечке баш кошуп, жакындары менен жакшылыгын белгилеген.
Тынымсыз изденүүнүн үстүндө жүрүп, башкалардан өзгөчө ыр, клиптерди жаратып келген Омардын соңку жеңиши, үй-бүлөсү, кыргыз маданиятына болгон көз карашы, чыгармачылык жолу, келечек пландары тууралуу сиз кызыккан суроолор болсо мүмкүнчүлүктү колдон чыгарбаңыз.
Суроолорго түз эфир жүрүп жатканда "Соңку кабар" аркылуу комментарий жазып жооп алсаңыздар болот.
15:10 Ырчы Омар SUPER.KG`нин түз эфирине кечигүүдө.
15:15 Омардын түз эфирдеги маеги башталды. Ал алып баруучунун "Ойготкуч суроолоруна" жооп берүүдө.
15:20 Суроо: "Silk Way Star" сынагында жеңишке жетип канча акчалай сыйлык алдыңыз?
Жооп: "Башында 10 миң доллардын тегерегиндеги акчалай сыйлык берилет деп айтып жатышкан, бирок сынак аягына чыкканда андай болгон жок. Долбоорду ишке ашырууга көптөгөн каражат жумшалып калды окшойт".
15:25 Суроо: Сиздин жеңишиңизге ичи тарыгандар болдубу?
Жооп: "Бул жеке эле менин эмес, долбоорго катышкан бардык катышуучу, уюштуруучулардын жеңиши деп эсептейм. Бирок сынактын аягында чын эле атаандаштык күч алып, ар кандай кептер айтыла баштады".
15:28 Суроо: "Жеңебиз жеңишиңиз менен куттуктап эмне белек берди?"
Жооп: "Жеңгенимди ноябрь айында билгем. Анда жубайым экөөбүз үйлөнө элек болчубуз. Өзү студент болгонуна карабай, чогултуп жүргөн акчасына бир сыйра кышкыга кийим алып берген. Эң негизгиси көңүл маанилүү эмеспи".
15:31 Ырчы окурмандын суранычы боюнча сынакта ырдаган француз тилиндеги ырын аткарып жатат.
15:35 Суроо: Динге берилип кеттиң, чыгармачылыкта эркиндик керек да, мунун айынан чыгармачылыктан алыстап кетпейсиңби?
Жооп: "Мен чеги менен ырчы болгум келет. Бул бир келген жашоодо адептүү өмүр сүрүү керек деп ойлойм".
15:38 Суроо: Омар мени экинчи жубай кылып алат белең?
Жооп: "Эки аял алганга шарият уруксат берет, бирок мен бир аялды тандайм. Куранда деле "бир аялың болгон жакшыраак" деп айтылат эмеспи".
15:41 Суроо: Чектен ашып кеткен күйөрмандарыңызга кандай карайсыз?
Жооп: "Аябай чектен ашкан деле күйөрмандарым жок, баары өз орду менен. Алардан дайыма ар түрдүү белектерди алам. Өзүм кызганчаак болгондуктан жубайым мени кызганбасын деп өзүмдү татыктуу алып жүргөнгө аракет кылам".
15:41 Суроо: Жашоодогу урааныңыз?
Жооп: "Алланын ыраазычылыгы үчүн жашоо".
15:43 Суроо: Жубайыңыз кандай кожейке болуп жатат?
Жооп: "Азыркы тапта Диана (ред. жубайы) бизди күндө түрдүү тамактары менен кубантып жаткан мезгили. Ал тамакты даамдуу жасайт, экөөбүз үйлөнгөнгө чейин 2 ай атайын курстарга барган".
15:45 Эфирде оюн орун алды.
15:47 Суроо: Жубайыңыз жоолук салынбай эле динди карманса болбойбу? Сиздер ар кандай иш-чараларга барганда жаш кыз каалаган кийимин кие албай кыйналбайбы?
Жооп: "Жубайым хиджап кийген эмес. Ал кыргызча эле чачын жаап жоолук салынып жүрөт. Жоолук менен деле өз табитине жараша саркеч жакшы көйнөктөрдү таап алат деп ойлойм. Ал жоолукту менин эмес, өзүнүн каалоосу менен салынган".
15:52 Суроо: Эгерде мен жаныңызда болсом колуңуздагы саатты белекке берет белеңиз?
Жооп: "Мен үчүн өтө баалуу болгон сааттар бар, мисалы, апам алып берген саат жөнөкөй, бирок мен үчүн өтө кымбат. Ал саатты тагынып жүргөн болсом бербейт болчумун. Негизи көп эле жолу сааттарымды белекке берген учурлар болгон. Бирок бирөөдөн белекке алган сааттарымды бере албайм".
15:55 Суроо: Кыргыз өлкөсүндө номер биринчи ырчы ким деп эсептейсиз?
Жооп: "Менин оюм боюнча, азыркы мезгилде эң алдынкы ырчы Мирбек Атабеков, аны көп кырдуу талант деп билем. Ар бир ырдап чыккан ыры өз угарманын табат".
15:57 Суроо: Чет элдик кайсы бир ырчы менен дуэт ырдайын деген оюңуз барбы?
Жооп: "Ырчылар келишимдин негизинде дуэт аткарышат. Азыркы тапта биздин өлкөгө кызыккан чет элдик ырчы жок. Дуэт жаздырууга каалоом бар, бирок мүмкүнчүлүк жок".
16:00 Суроо: Менеджериңиз Миргүл Эсеналиева менен көп жылдын бери чогуу иштешип жүрөсүздөр. Ал канча айлык алат?
Жооп: "Миргүл менин менеджерим, бирок аны менеджер гана эмес өзүмдүн эң жакын адамым катары билем. Канча айлык аларын айта албайм. Эң негизгиси ал бардык жактан колдой алат, мен ага толугу менен ишенем. Өзү кээ бир эркектерге караганда "эркекче" жүрөт".
16:08 Суроо: Сынакта Казак өлкөсүнүн ырчысы Айкын менен мамилеңиз жакшы эместей көрүндү. Буга себеп эмне?
Жооп: "Айкын менен болгон мамилем жакшы. Сынактын аягында атаандаштык күчтүү болду, бирок Айкын менен эмес. Болгону сынактын финалында тирешүү абдан күчтүү болуп кетти. Жубайымдын колун ошол жактан сурайын дегем, бирок башка катышуучулар "Омар шоу жасады" деп нааразы болбосун деген ойдо андай кылган жокмун".
16:13 Суроо: Жаңы жылга кандай пландарыңыз бар?
Жооп: "Учурда мен иштеп, Диана окуусу менен алек. Жаңы жылдан кийин үлпөт тойдо белекке алган жолдомолор менен чет өлкөгө барып эс алып келүүнү баштайбыз".
16:15 Ырчы Омардын түз эфирдеги маеги соңуна чыкты.
