Балыкчы-Корумду унаа жолун салып жаткан жумушчулар айлык акыларын алышты

Балыкчы-Корумду унаа жолун салып жаткан жумушчулардын айлык акысы которулду. Бул тууралуу Транспорт жана коммуникация министрлиги билдирди.

Маалыматка ылайык, 2017-жылдын аягында мамлекеттик бюджетте акча тартыштыгына байланыштуу Балыкчы-Корумду унаа жолунун салынышы токтоп калган. Мындан улам министрликтин жол куруучуларга болгон карызынын саны 77,9 миллион сомду түзгөн. Министрлик жолду куруу үчүн жүргүзүлгөн тендерди утуп жана курулуш иштерин аткарып жаткан кытайлык "Лонг-Хай" ишканасынын эсебине 78 миллион сом которгон.

Эскерте кетсек, буга чейин жол куруучулар басма сөз жыйынын өткөрүп, бийлик өкүлдөрүнө айлык акыларын Жаңы жылга чейин төлөп берүү өтүнүчү менен кайрылышкан.

Автор: Айзада Тураркулова