Акылбек Осмоналиев президенттин жана өкмөттүн иш башкаруучусунун биринчи орун басары болуп дайындалды

Акылбек Осмоналиев президенттин жана өкмөттүн иш башкаруучусунун биринчи орун басары болуп дайындалды. Бул тууралуу бүгүн, 31-декабрда президенттик аппараттын басма сөз кызматы билдирди.

Маалыматка ылайык, тийиштүү буйрукка президент Сооронбай Жээнбеков кол койду.

Буга чейин бул кызматта иштеген Ренат Түлөбердиев премьер-министр Сапар Исаковдун буйругу менен Мамлекеттик мүлктү башкаруу фондунун төрагасы болуп дайындалган.

Акылбек Осмоналиев 1964-жылы 10-августта Кыргыз Республикасынын Ош облусуна караштуу Ноокат районунда төрөлгөн. Ал 1988-жылы Кыргыз айыл чарба институтунун зоотехник адистигин бүтүргөн. 1997-жылы Кыргыз мамлекеттик улуттук университетинин юриспруденция адистигин бүтүргөн.

- 1981-жылдын 1-июлунан 1983-жылдын августуна чейин Ош облусунун Ноокат районундагы ат заводунун жумушчусу,

- 1988-жылдын июлунан 1989-жылдын августуна чейин аталган заводдун зоотехниги;

- 1989-жылдын августунан 1992-жылдын апрелине чейин Ноокат агроөнөр жай бирикмесин башкы адиси;

- 1992-жылдын апрелинен 1994-жылдын мартына чейин Ноокат райондук мамлекеттик администрациясынын аппаратынын референти;

- 1994-жылдын мартынан 1995-жылдын майына чейин №44 ат заводунун директорунун орун басары;

- 1995-жылдын майынан 1996-жылдын августуна чейин “Алике” дыйкан чарбасынын жетекчиси;

- 1996-жылы Жогорку Кеңештин эл өкүлдөр жыйынынын аппаратынын Агрардык маселелер боюнча комитетинин 1-категориядагы адиси;

- 1997-жылдын май айынан тартып аталган комитеттин референти;

- 1999-жылдын январынан декабрына чейин комитеттин эксперти;

- 1999-жылдан 2000-жылдын апрелине чейин Айыл жана суу чарба министрлигинин мал чарбасынын продукцияларын өндүрүүнү өркүндөтүү жана маркетинг департаментинин башчысы;

- 2000-жылдын апрелинен тартып Жогорку Кеңештин эл өкүлдөр жыйынынын төрагасынын орун басарынын жардамчысы;

- 2004-жылдын майынан 2005-жылдын апрелине чейин премьер-министрдин аппаратынын мамлекеттик жана муниципалдык кызмат башкармалыгынын уюштуруу иштери боюнча инспектору;

- 2005-жылдын апрелинен 2006-жылдын июнуна чейин Жогорку Кеңештин Агроөнөр жай комплекси жана экология боюнча комитетинин, Жер пайдалануу боюнча комиссиясынын ишмердигин камсыз кылуу боюнча бөлүмдүн башчысынын орун басары;

- 2006-жылдын июнунан 2009-жылдын январына чейин президенттик администрациясынын Экономикалык жана социалдык саясат секторунун эксперти;

- 2009-жылдын январынан тартып Улуттук статистика комитетинин төрагасынын орун басары;

- 2012-жылдын февраль айынан 2016-жылдын апрелге чейин Улуттук статистика комитетинин төрагасы;

- 2016-жылдын апрель айынан өкмөттүн аппарат жетекчиси.

Автор: Жылдыз Джускембаева