Бүгүн, 11-январда Жогорку Кеңештин жыйынында Кыргыз өкмөтү менен Орусия өкмөтүнүн ортосундагы миграция чөйрөсүндөгү өкүлчүлүктөрүн өз ара түзүү маселеси каралды. Тиешелүү мыйзам долбоору 3-окууда жактырылды.
Парламенттин Эл аралык иштер, коргоо жана коопсуздук боюнча комитеттин төрагасы Исхак Пирматовдун айтымында, бул долбоор менен Кыргыз миграция кызматы Орусия аймагында дипломатиялык кызматкер статусуна ээ болгон 9 өкүлчүлүк ачууну көздөйт. Ошону менен бирге, Орусиянын Бишкек жана Ош шаарларындагы 2 өкүлчүлүгү мыйзамдуу бекитилмекчи.
Депутаттар Тышкы иштер министрлигинен мындан ары да Орусияда эле эмес, чет өлкөлөрдүн баарында өкүлчүлүктөрдүн санын көбөйтүү чараларын колго алууну сунушташты.