Бишкекте жөө адамды сүзүп качып кеткен айдоочу кармалды

Бишкекте жөө адамды сүзүп качып кеткен айдоочу кармалды. Бул тууралуу бүгүн, 22-январда Жол кыймылынын коопсуздугун камсыздоо башкы башкармалыгынан билдиришти.

Маалыматка караганда, жол кырсыгы 20-январь күнү саат 19:30 чамасында Бишкектин Садырбаев көчөсү менен Түштүк магистралынын кесилишинде болгон. Анда белгисиз айдоочу унаасы менен 55-60 жаштагы жөө адамды сүзүп, качып кеткен. Жабырлануучу окуя болгон жерден жан берген.

Ал эми окуядан көп өтпөй 29 жаштагы С.Э. аттуу айдоочу кармалган.

Анын айтымында, үй-бүлөсү менен келе жатып маркумду сүзүп алган. Балдары ыйлап баштагандыктан кетип калган. Учурда тиешелүү экспертизалар дайындалып, тергөө амалдары жүрүүдө.

Автор: Бекжан Рыскулов